15:44 / 21.05.2021
10225
«Tesla rasman MDH davlatlari bozoriga kirishi mumkin» – Ilon Mask

 Tesla va SpaceX asoschisi Ilon Mask tez orada Tesla MDH bozorlariga kirishi mumkinligini aytdi. Shuningdek, u Rossiyada Tesla zavodini ochishga ruxsat berdi.

Tesla va SpaceX asoschisi Ilon Mask «Novoye znaniye» Butunrossiya forumida tez orada Tesla kompaniyasi MDH bozorlariga kirishi mumkinligini aytdi. Bu haqda «Vedomosti» nashri xabar berdi.

«Menimcha, biz tez orada Rossiyada bo‘lamiz. Shuningdek, Qozog‘iston va boshqa MDH davlatlariga kengroq e'tibor qaratishimiz kerak. Bu biz uchun muhim», dedi Mask. Shuningdek, u Tesla ishlab chiqarish geografiyasini kengaytirishini aytdi, shu jumladan Rossiyada Tesla zavodini ochishga ruxsat berdi.

Hozirda Tesla’ning Amerika Qo‘shma Shtatlarida zavodlari bor. 2019 yildan beri Shanxaydagi zavodida elektromobillar to‘liq ishlab chiqariladi. Germaniyaning Berlin shahri hududida Tesla zavodi qurilishi boshlangan. Kompaniya ishlab chiqarish geografiyasi kengayishini AQShdan tovarlarni tashish xarajatlarini pasaytirish va dunyodagi boshqa mamlakatlar xaridorlariga elektromobillarni arzonroq sotish zarurati bilan izohlaydi.

Tesla’ning AQSh, Meksika, Yevropa ittifoqi mamlakatlari (Fransiya, Buyuk Britaniya, Germaniya, Ispaniya, Portugaliya), BAA, Xitoy, Yaponiya, Janubiy Koreya, Tayvanda savdo ofislari mavjud.

Avvalroq, Ilon Mask Tesla o‘z elektromobillarini bitkoinga sotishni to‘xtatganini e'lon qilgandi, shundan so‘ng bitkoin va boshqa kriptovalutalar qiymati keskin tushib ketdi.

Mavzuga oid
Top