Ijtimoiy tarmoqlarda tarqalgan videoga ko‘ra, joriy yil 1 avgust kuni Qashqadaryo viloyati Yakkabog‘ tumani tibbiyot birlashmasiga qarashli tug‘uruq bo‘limiga murojaat qilib kelgan shu tumanda yashovchi homilador ayolga shifokorlar e'tibor qaratishmagan. So‘ng uni viloyat markaziga jo‘natib yuborishgan. Oqibatda, Qarshiga ketishda, yo‘lda mashina ichida ayolning ko‘zi yorigan va chaqaloq vafot etgan.
Mazkur hodisa yuzasidan Qashqadaryo viloyati sog‘liqni saqlash boshqarmasi munosabat bildirdi. Munosabatda yozilishicha, holat yuzasidan Yakkabog‘ tumani tibbiyot birlashmasiga qarashli tug‘uruq bo‘limi shifokorlariga nisbatan xizmat tekshiruvi tayinlangan. Bundan tashqari, ayni paytda holat huquqni himoya qilish organlari tomonidan o‘rganilmoqda.
