Ижтимоий тармоқларда тарқалган видеога кўра, жорий йил 1 август куни Қашқадарё вилояти Яккабоғ тумани тиббиёт бирлашмасига қарашли туғуруқ бўлимига мурожаат қилиб келган шу туманда яшовчи ҳомиладор аёлга шифокорлар эътибор қаратишмаган. Сўнг уни вилоят марказига жўнатиб юборишган. Оқибатда, Қаршига кетишда, йўлда машина ичида аёлнинг кўзи ёриган ва чақалоқ вафот этган.
Мазкур ҳодиса юзасидан Қашқадарё вилояти соғлиқни сақлаш бошқармаси муносабат билдирди. Муносабатда ёзилишича, ҳолат юзасидан Яккабоғ тумани тиббиёт бирлашмасига қарашли туғуруқ бўлими шифокорларига нисбатан хизмат текшируви тайинланган. Бундан ташқари, айни пайтда ҳолат ҳуқуқни ҳимоя қилиш органлари томонидан ўрганилмоқда.
