22:05 / 15.09.2021
14346
AQSh maxsus vakili Kobulning olinishiga Ashraf G‘anining qochishi sabab bo‘lganini aytdi

Xalilzodning qayd etishicha, “Eng oxirgi daqiqalarda ham AQShning toliblar bilan ularning Kobulga kirmasligi borasida kelishuvi bo‘lgan”, ammo G‘anining Afg‘onistonni tark etish qarori xavfsizlik sohasidagi bo‘shliqni paydo qilgan.

Foto: AR/TASS

Afg‘oniston prezidenti Ashraf G‘anining mamlakatni tark etishi “Tolibon” harakati bilan erishilishi mo‘ljallangan kelishuvni yo‘qqa chiqardi, dedi AQSh maxsus vakili Zalmay Xalilzod.

U Financial Times nashriga bergan intervyusida G‘anining ketishi “Kobulning toliblar qo‘liga o‘tishiga yo‘l qo‘ymaslik va siyosiy o‘tish jarayoni to‘g‘risidagi muzokaralarni boshlashga qaratilgan kelishuv tuzilishini yo‘qqa chiqargan”ini aytdi.

Uning qayd etishicha, “eng oxirgi daqiqalarda ham AQShning toliblar bilan ularning Kobulga kirmasligi borasida kelishuvi bo‘lgan”, ammo G‘anining Afg‘onistonni tark etish qarori xavfsizlik sohasidagi bo‘shliqni paydo qilgan. Natijada toliblar Kobulga shu kuniyoq kirib borgan.

“G‘ani qochib ketganidan so‘ng toliblar “Kobul xavfsizligi uchun sizlar javob berasizlarmi?” deb so‘rashdi. Keyin nima bo‘lganini bilasizlar. Biz bunday javobgarlikni zimmamizga olmadik”, - dedi Xalilzod.

Uning so‘zlariga ko‘ra, “Afg‘oniston hukumati va toliblar o‘rtasida muzokaralar o‘tkazilmagani yoki tomonlardan birining muzokaralardan chiqib ketgani uchun AQSh javobgar emas”.

Top