O‘zbekistonda elektron tijorat ma’murchiligi takomillashtiriladi

Prezidentning «Elektron tijorat ma’murchiligini takomillashtirish va uni yanada rivojlantirish uchun qulay sharoitlar yaratish to‘g‘risida»gi qaroriga muvofiq ayrim NHHlarga o‘zgartirish va qo‘shimchalar kiritilmoqda. 

Ular quyidagi tartiblarni belgilaydi: elektron tijorat platformalari va raqamli ekotizim operatorlari – axborot vositachilari faoliyatini tashkil etish tartibi; Investitsiyalar va tashqi savdo vazirligi huzuridagi Raqamli transformatsiya markazi elektron kooperatsiya portalida axborotni joylashtirish va xaridlarini amalga oshirish tartibi.

Bunda mahalliylashtirish darajasining yuqori chegarasini aniqlash hamda ushbu belgilangan darajaga muvofiqligi to‘g‘risidagi ma’lumotlarning ishonchliligini tekshirish nazarda tutilmoqda.

Bundan tashqari, qo‘shimcha garov joriy etilishi munosabati bilan, shartnoma majburiyatlarini bajarishdan bosh tortish, sun’iy arzon narxlarda takliflar berish yo‘li bilan xaridlar uzilishining oldini olish mexanizmi joriy etilmoqda.

Shuningdek, xarid qilish tartib-taomillarining tugash vaqtini faqat ish kunlari va ish soatlarida belgilash orqali bozorni manipulyatsiya qilish imkoniyati istisno qilinmoqda.

Shartnoma majburiyatlarining bajarilishi kafolatlarini ta’minlash tartibini operatorning hisob-kitob kliring palatasida xaridlar ishtirokchilarining shaxsiy hisobvaraqlaridagi depozitlarni oldindan to‘lash va blokirovka qilish orqali belgilash nazarda tutilmoqda.

Shu bilan bir qatorda, shartnoma majburiyatlarini bajarish uchun kafolatlar berish tartibi joriy etilmoqda.