Jinoiy to‘dalar yordamga muhtoj jabrlanuvchilarni internetda yolg‘on va’dalar bilan o‘ziga tortadi va ularni to‘g‘ridan to‘g‘ri chegarada tutib oladi, dedi YeXHT rahbari Helga Mariya Shmid Die Welt nashriga bergan intervyusida.
Ukrainada keng ko‘lamli urush boshlanganidan buyon odam savdosi keskin oshgan, dedi Yevropada xavfsizlik va hamkorlik tashkiloti (YeXHT) bosh kotibi Helga Mariya Shmid. Jabrlanuvchilar internetda yolg‘on va’dalar bilan aldanib qolishadi, qabul qilayotgan mamlakatlarda joylashgan shaxsiy turar joylarida zo‘ravonlik qurbonlari bo‘ladilar yoki to‘g‘ridan to‘g‘ri chegarada odam savdogarlari tomonidan ushlanadi, dedi u 9 yanvar, dushanba kuni chop etilgan Germaniyaning Die Welt gazetasiga bergan intervyusida.
«Ko‘pincha bu ishda uyushgan jinoyatchilik ishtirok etadi. Bu jinoyatchilar yordamga muhtoj, pul topishga majbur bo‘lgan, yangi mamlakat tilini bilmaydigan va ko‘pincha urush natijasida ruhiy jarohat olgan odamlar bilan uchrashadi», - deydi tashkilot rahbari. Urush boshlanganidan beri ukrainalik ayollar va bolalarning jinsiy xizmatlari va tasvirlari uchun onlayn so‘rovlar soni 600 foizga oshgan, dedi Shmid. Homilador ayollarni sotish holatlari ham ko‘paygan, dedi u.
Umuman olganda, YeXHT hisob-kitoblariga ko‘ra, dunyo bo‘ylab 25-27 million kishi odam savdosi qurboniga aylangan bo‘lsa, huquq-tartibot idoralari e’tiboriga bor-yo‘g‘i 10 ming holat tushgan va qurbonlarning bir foizdan kamrog‘ini aniqlash mumkin. Bu odam savdosi bilan shug‘ullangan jinoyatchilar aksariyat hollarda jazosiz qolayotganidan dalolat beradi, deya qo‘shimcha qildi YeXHT rahbari. Ayni paytda, uning so‘zlariga ko‘ra, odam savdosidan yillik daromad so‘nggi 15 yil ichida besh barobarga oshib, 150 milliard dollarga yetgan.
YeXHT 1,3 milliard aholiga ega 57 davlatdan iborat. 2022 yildan beri Rossiya tashkilotning budjetini bloklab kelmoqda.
