Belarus rahbarining so‘zlariga ko‘ra, u o‘zining «eski do‘sti», Xitoy Xalq Respublikasi raisi Si bilan uchrashishni intiqlik bilan kutmoqda.
Belarus rahbari Xitoyga davlat tashrifi bilan keldi. Aleksandr Lukashenkoning samolyoti 28 fevral, seshanba kuni Pekin aeroportiga qo‘ndi.
Belarus rahbarining so‘zlariga ko‘ra, u o‘zining «eski do‘sti», XXR raisi Si Jinping bilan uchrashishni intiqlik bilan kutmoqda, deb xabar berdi «Sinxua» axborot agentligi.
Tashrif oldidan agentlik bilan suhbatda Lukashenko Pekinning Ukraina bo‘yicha pozitsiyasini «uning tinchliksevar tashqi siyosatining dalili, shuningdek, butun dunyo uchun keng ko‘lamli oqibatlarga olib keladigan yangi va mustaqil qadami» sifatida yuqori baholadi. «Bugungi kunda dunyoda birorta muammoni Xitoysiz hal qilib bo‘lmaydi», deb qo‘shimcha qildi Aleksandr Lukashenko.
Belarus rahbarini aeroportda tashqi ishlar vazirining birinchi o‘rinbosari Ma Chjaosyuy va Xitoyning Belarusdagi elchisi Se Syaoyun kutib oldi. Uchrashuvda Belarus bosh vazirining birinchi o‘rinbosari Nikolay Snopkov, tashqi ishlar vaziri Sergey Aleynik, Belarusning Xitoydagi elchisi Yuriy Senko ham ishtirok etdi.
Asosiy e’tibor savdo-iqtisodiy, sarmoyaviy va humanitar hamkorlikni rivojlantirish, qo‘shma loyihalarni amalga oshirish, siyosiy sohada o‘zaro hamkorlik, xalqaro maydondagi eng keskin chaqiriqlarga javob berishga qaratiladi, deb xabar qildi BelTa.
Pekinda Lukashenko XXR yuqori mansabdor shaxslari, yetakchi Xitoy korporatsiyalari rahbariyati bilan ham bir qator uchrashuvlar o‘tkazadi. Muzokaralar yakuniga ko‘ra, yirik hujjatlar to‘plami imzolanishi kutilmoqda.
