Yunusobod dehqon bozoriga tutash do‘kon va dorixonada yong‘in sodir bo‘ldi

Toshkent shahrining Yunusobod tumanida joylashgan dehqon bozorga tutash  do‘kon va dorixonada yong‘in yuz berdi. Favqulodda vaziyatlar vazirligi hodisa yuzasidan rasmiy ma’lumot taqdim etdi.

Bugun, 8 iyun kuni soat 12:50 da Toshkent shahar Yunusobod tumani Amir Temur ko‘chasida joylashgan do‘kon va dorixonada yong‘in sodir bo‘lganligi to‘g‘risida shahar FVBga xabar tushgan.

Shunga ko‘ra, 5 ta yong‘in-qutqaruv ekipaji soat 12:58 da voqea joyiga yetib borib, yong‘in soat 13:04 da o‘rab olingan va soat 13:09 da o‘chirilgan.

Yong‘in oqibatida, dastlabki ma’lumotlarga ko‘ra, do‘kon va dorixonaning taxminan 80 kvadrat metr maydonda old tomon qismi yonib zararlangan.

Hodisa oqibatida tan jarohati olgan va halok bo‘lganlar yo‘q. Yong‘in sababi va moddiy zarar miqdori aniqlanmoqda.