YeI harbiy shtabi boshlig‘i NATO qo‘shinlarining Ukrainaga kirishi ehtimoli haqida gapirdi

Yevropa Ittifoqi harbiy shtabi boshlig‘i, Ukraina harbiylarini tayyorlash missiyasi qo‘mondoni Erve Blejanning aytishicha, Ukrainaga NATO qo‘shinlarini kiritish mumkin emas, bu NATO rejalarida yo‘q va bo‘lmaydi ham. Bu haqda u LCI telekanali efirida gapirib o‘tdi.

Uning so‘zlariga ko‘ra, voqealarning bunday rivojlanishi haqida gap-so‘z bo‘lishi mumkin emas.

“Ukrainaga quruqlikdagi kuchlarni yuborish mojaro tarafiga aylanish va Rossiya bilan urush qilish demakdir. Hech kim buni xohlamaydi, na NATO, na Yevropa Ittifoqi”, - dedi Blejan.

Shu tariqa, u Shimoliy Atlantika alyansi sobiq bosh kotibi Anders Fog Rasmussenning bayonotiga izoh berdi. Rasmussenning fikricha, voqealar rivoji shunday tus olishi mumkin.

Blejanning qo‘shimcha qilishicha, alyans a’zolari mojaro tarafi emas va unga aylanmaydi.

Avvalroq NATO bosh kotibi Yyens Stoltenberg Bryusseldagi matbuot anjumanida AQSh boshchiligidagi Ukraina bo‘yicha aloqa guruhi ukrainalik uchuvchilarni F-16 qiruvchi samolyotlariga tayyorlash masalasini muhokama qilishini bildirgandi.