Toshkentda vaqtinchalik bepul avtobus yo‘nalishi tashkil etildi

2023 yil 3 oktyabr kunidan boshlab, «Toshshahartransxizmat» tomonidan 3M-sonli «Xalqaro aeroport» bekatini ko‘prik yo‘li orqali Yakkasaroy TIIB bekati bilan bog‘lovchi 2 ta mikroavtobus harakatlanuvchi vaqtinchalik bepul yo‘nalish tashkil etildi.

2023 yilning 1 oktyabr kunidan boshlab, Toshkent xalqaro aeroporti va Bobur ko‘chasini bog‘lovchi ko‘prik yo‘lini ta’mirlash ishlari doirasida ko‘prik yo‘li orqali avtobuslar va yuk transportining harakati vaqtinchalik cheklangan.

Mazkur ko‘chalar orqali qatnaydigan avtobus yo‘nalishlarining harakati yangicha tartibda tashkil etiladi.

Bunda:

• 67-, 76-, 94-sonli avtobus yo‘nalishlarining harakati Bobur ko‘chasidagi Yakkasaroy TIIB bekatida qisqartiriladi;
• 11-, 40-, 45-sonli avtobus yo‘nalishlarining harakati Bobur ko‘chasidan Nukus, A.Qahhor, A.Qahhor-7, Kichik Beshyog‘och, Kichik halqa yo‘li, Sariko‘l, Temiryo‘lchilar, H.Aliyev, Lokomotiv, Qumariq ko‘chalari orqali keyingi harakati o‘z yo‘nalishi bo‘ylab vaqtinchalik o‘zgartiriladi;
• 61-, 106-sonli avtobus yo‘nalishlari harakati «Aeroport-2» bekatida qisqartiriladi;
• 47-, 77-sonli avtobus yo‘nalishlarining harakati Bobur ko‘chasidan Nukus, A.Qahhor, A.Qahhor-7, Kichik Beshyog‘och, Kichik halqa yo‘li, Sariko‘l, S.Banokatiy, Lokomotiv, Qumariq ko‘chalari orqali keyingi harakati o‘z yo‘nalishi bo‘ylab vaqtinchalik o‘zgartiriladi.