OAV: Abdukarim Mirzayev Turkiyadan deportatsiya qilinmaydi

Istanbulda hibsga olingan o‘zbekistonlik jurnalist Abdukarim Mirzayev Turkiyadan deportatsiya qilinmaydigan bo‘ldi. Bu haqda Istanbul migratsiya boshqarmasiga asoslanib, Registon TV xabar berdi.

Foto: YouTube

«Uning ozod etilishi esa vaqt masalasi», – deyiladi jurnalist ishlab kelgan telekanal axborotida.

Eslatib o‘tamiz, Abdukarim Mirzayev 11 dekabr kuni turk politsiyasi tomonidan qamoqqa olingan edi. Advokatining ma'lum qilishicha, u go‘yoki «shubhali shaxslar» bilan aloqadorlikda gumonlanib qo‘lga olingan.

Dastlabki tekshiruvlarda mazkur gumon tasdiqlanmagan bo‘lsa-da, jurnalistni Turkiyadan deportatsiya qilishga qaror qilingandi.

O‘zbekiston Bosh prokuraturasi O‘zbekistonda Abdukarim Mirzayevga nisbatan hech qanday ish ochilmagani va u qidiruvda emasligini ma'lum qilgan.

Ahloqiy-ma'rifiy mavzulardagi hikoyalari bilan tanilgan jurnalist ayni paytda Turkiyaning Kastamonu universiteti Kommunikatsiyalar fakulteti jurnalistika bo‘limi magistranti sanaladi.