Jurnalist Abdukarim Mirzayev Turkiyada qamoqqa olindi

Qayd etilishicha, Turkiyaning Kastamonu universiteti Kommunikatsiyalar fakulteti jurnalistika bo‘limi magistranti Abdukarim Mirzayevni huquqiy jihatdan himoya qilish uchun yollangan advokat vaziyatni o‘rgangach, kimdir Abdukarim Mirzayevga tegishli raqam orqali shubhali shaxslar bilan muloqotda bo‘lgani haqida xabar bergani, ushbu ma'lumot ortidan jurnalist kuzatilib, so‘ngra qo‘lga olinganini aniqlagan.

Xabarda aytilishicha, 10 dekabrdan 11 dekabrga o‘tar kechasi harbiy libosdagi to‘rt kishi, shuningdek, fuqaro kiyimidagi shaxslar Abdukarim Mirzayevning uyiga kelib, tintuv o‘tkazgan. So‘ng ular hujjatlarni rasmiylashtirib, jurnalistni olib ketishgan.

Ma'lum qilinishicha, Abdukarim Mirzayevni mamlakatdan deportatsiya qilish to‘g‘risida qaror chiqarilgan. U Migratsiya idorasining chet elliklarni saqlash bo‘limiga yuborilgan. 

«Ayni vaqtda deportatsiya to‘g‘risidagi qarorni bekor qilish, kuzatuvni to‘xtatish to‘g‘risidagi da'vo tayyorlanmoqda», - deyiladi ma'lumotda.

O‘zbekiston rasmiy idoralari holat yuzasidan hozircha bayonot bergani yo‘q. 

Avvalroq «Ziyouz» portali asoschisi Davronbek Tojialiyev Istanbulga kiritilmay, O‘zbekistonga deportatsiya qilingani ma'lum bo‘lgandi.