Barcha tibbiyot oliygohlarida «oliy hamshiralik ishi» ochiladi, kvota ikki barobarga oshiriladi

Sohada kadrlar tayyorgarligini zamonaviy talablarga moslashtirish doirasida qator choralar belgilandi.

Barcha tibbiyot oliygohlarida «oliy hamshiralik ishi» yo‘nalishi ochiladi. Kelgusi yildan qabul kvotalari ikki barobarga ko‘payadi.

2027 yildan boshlab kvotalar eng kamida 20 foizdan bosqichma-bosqich oshiriladi. Maqsad — yaqin yillarda **oliy ma’lumotli hamshiralar ulushini 10 foizga yetkazish.

Oliy ma’lumotli hamshiralar uchun maoshga 100 foiz ustama joriy etiladi.

Shu bilan birga, o‘rta ma’lumotli hamshiralarni tayyorlash tizimi ham yangilanadi. Bu borada Angliyaning Pearson kompaniyasi bilan hamkorlikda har bir hududda bittadan texnikum bazasida xalqaro standartlar asosida o‘qitish boshlandi. Davomiylik sifatida Germaniya, Shveytsariya, AQSh kabi davlatlarning ta’lim dasturlari ham joriy etiladi.

Kutilishicha, ushbu choralar natijasida xalqaro talablarga javob beradigan, xorijiy tillarni biladigan hamshiralar korpusi shakllanadi; shifokor bilan yonma-yon ishlaydigan, tashxis, davolash va profilaktikada faol ishtirok etuvchi kadrlar ulushi ortadi.