Shavkat Mirziyoyev: tibbiyot markazlarida uskunalar quvvatining faqat 25 foizi ishlatilyapti

Davlat rahbariga ko‘ra, so‘nggi besh yilda ixtisoslashtirilgan markazlarga 7,5 trln so‘m mablag‘ ajratildi, minglab zamonaviy uskunalar o‘rnatildi. «Dori yetmayapti deb birorta markaz ayta oladimi?» deya savol qo‘ygan prezident asosiy muammo — resurslardan samarali foydalanish ekanini ta’kidladi.

«Mana shu mablag‘lar, uskunalar va dori-darmonlar qanday ishlatilyapti? Afsuski, uskunalarning quvvatidan bor-yo‘g‘i 25 foiz foydalanilmoqda», — dedi prezident.

Shu munosabat bilan:

• raqamlashtirish, xalqaro hamkor topish, klinik protokollarni yangilash;
• ilg‘or diagnostika, profilaktika va davolashni uddalaydigan zamonaviy jamoalarni shakllantirish;
• natija ko‘rsatmagan markaz, tuman, viloyat boshqarmalarining faoliyatini keskin qayta ko‘rib chiqish zarurligi ta’kidlandi.

Shuningdek, har bir mahalla va tuman kesimida qaysi kasalliklar ko‘paygan/kamaygani bo‘yicha aniq tahlil o‘tkazib, profilaktika va davolash rejalarini joriy etish vazifasi qo‘yildi. Respublika markazlari esa bunday tahlil va yondashuv bilan ishni pastda tashkil etish, katta mablag‘ evaziga berilgan eng zamonaviy uskunalardan to‘liq quvvatda foydalanishni ta’minlashi shartligi ko‘rsatib o‘tildi.