Россия ва АҚШ ўртасида Сурия бўйича келишув барбод бўлса, Вашингтон Сурия мухолифатини учинчи томон қуроллантиришини назорат қила олмаслиги мумкин. АҚШ давлат котиби ўринбосари Энтони Блинкен Sputnik агентлигига берган интервьюсида шундай фикрларни билдирган

«Кўпгина ташқи ўйинчилар бор. Биз ўтган йиллар давомида уларнинг айримларини қайтариб турдик. Бироқ, Суриядаги турли гуруҳларни қўллаб-қувватлаётганларни тўхтатиб қолиш қийин бўлади», — деган Блинкен.

Унинг сўзларига кўра, Ҳалабга уюштирилаётган ҳужум Суриядаги қуролли зиддиятнинг янада кескинлашувига олиб келади. «Ҳалабга амалга оширилаётган даҳшатли ҳужум оқибатида фуқаролик уруши авж олиб кетиши мумкин», — деган америкалик дипломат.

Блинкеннинг қўшимча қилишича, Россия ва АҚШнинг Сурия бўйича келишуви Дамашқ ва Москва ҳаракатлари туфайли барбод бўлиш ёқасида турибди. 

Аввалроқ, Reuters агентлиги хабар қилганидек, АҚШ президенти Барак Обама маъмурияти Сурия ҳукумат қўшинларининг Россия кўмагида Ҳалабга ҳужумни кучайтиришига қарши қатъийроқ чоралар кўриш имкониятларини муҳокама этмоқда. Бундай чораларга АҚШнинг Форс кўрфазидаги иттифоқчиларига исёнчиларни замонавий қуроллар билан таъминлашга изн бериши ҳам киради. 

29 сентябрь куни АҚШ давлат котиби Жон Керри Россия ТИВ раҳбари Сергей Лавров билан телефон орқали мулоқотида Москвадан Сурия армияси Ҳалабга ҳужумни тўхтатиши учун Дамашққа босим ўтказишни ва ўт очишни тўхтатиш тартибига қайтишни талаб қилган. 

Россия ТИВ эса АҚШ баёнотини товламачилик деб баҳолаган эди.