Эрон ва Хитой Эроннинг Аракидаги оғир сувда ишловчи реакторни реконструкция қилишга илк шартномани имзолашди. Бу ҳақда "Синьхуа" ахборот агентлиги хабар бермоқда. 

Шартномани имзолаш расмий маросими 23 апрелда Венада бўлиб ўтди. 

Аввалроқ Эрон президенти Ҳасан Руҳоний Аракдаги реактор юқори халқаро стандартларга жавоб берувчи замонавий тадқиқот реактори бўлишини айтганди.

Аракдаги реакторни реконфигурация қилиш Эрон ядровий дастури бўйича қўшма ҳаракатлар дастури доирасида амалга оширилади. Реактор унда қурол плутонийсини ишлаб чиқариш мумкин бўлмайдиган тарзда қайта жиҳозланади.

Оғир сув баъзи турдаги реакторларда нейтронлар секинлаштиргичи сифатида қўлланади. Оғир сувдаги реакторларда табиий урандан қурол плутонийси олиш мумкин. 2016 йилда Эрон реакторнинг оғир сув ишлатилиши керак бўлган асосий қисмини демонтаж қилганини маълум қилганди.