SpaceX ходими "Инстаграм"даги ўз саҳифасида компания раҳбари ва Tesla асосчиси Илон Маскнинг бурғилаш машинаси тасвирланган биринчи суратни тақдим этди. Машинадан Лос-Анжелес остидан туннель қуриш мақсадида фойдаланилмоқда.

Сурат муаллифи унга “бурғилашнинг яна бир куни”, дея изоҳ қолдирди. Фотосуратга бошқа ҳеч қандай маълумотлар илова қилинмаган.

Қурилмада The Boring Company ёрлиғи бор, у Маскнинг эндиликда транспорт туннеллари ишлаб чиқиш ва қуриш билан шуғулланувчи фирмасидир.

SpaceX томонидан тақдим этилган фотосуратга ОАВ эътибор қаратди. Пайдо бўлган катта қизиқишдан сўнг, у суратни ўчириб ташлади ва Инстаграм’даги саҳифасини ёпиб қўйди. У нега шундай қилгани – номаълум.

Февраль ойида Маск Bloomberg’га бурғилаш машинаси тайёр экани ва ундан фойдаланилаётгани ҳақида хабар берганди. Унинг оғирлиги 1,2 минг тонна, диаметри – 7,9 метр, узунлиги эса – 121,9 метр келади. SpaceX асосчиси машинага исм ҳам қўйиб олган – уни Нанни, деб аташади.

Тақдим этилган суратда Нанни эканлиги – аниқ эмас. SpaceX вакили The Verge’нинг бу борада қилган мурожаатига жавоб қайтармаган. Нашрдан таъкидлашларича, суратдаги ускуна ҳажмига кўра қурилманинг бир қисми бўлиши мумкин.