Hafta davomida Yaqin Sharqda urush davom etdi, eronlik futbolchilar madhiya kuylashi yana diqqat markazida bo‘ldi, Amerika ramzi dollarning yangi kupyuralari Trampning imzosi bilan chiqariladigan bo‘ldi, Ukraina Saudiya Arabistoni bilan harbiy bitim imzoladi. Quyida haftaning shu va boshqa muhim xabarlarini yodga olamiz.
Urush davom etdi
Yaqin Sharqda fevral oxirida boshlangan urush hamon davom etmoqda. Amerika intensivlikni pasaytirdi, chunki Trampning aytishicha, «Eronda uradigan nishonning o‘zi qolmagan». Isroil esa har zamonda biror eronlik mulozimni o‘ldirmoqda. Tramp to‘g‘ri aytdi, hozir Eronda hech kim yuqori lavozimlarni egallashni istamayapti, chunki Larijoniy kabi davlat nomidan gapirganlar o‘ldirib yuborilyapti.
Lekin AQSh va Isroil urushdan nima ko‘zlayotgani aniq emas. Hozir faqat Ho‘rmuz bo‘g‘ozi bloklanishi asosiy muhokama mavzusi. Amerikaning harakatsizligiga qaraganda ular ham bo‘g‘oz yopiq qolishiga qarshi emasdek. Bo‘lmasa Eron oliy rahbarini bir necha soatda o‘ldirgan Amerika uchun birgina bo‘g‘ozni ochish muammo tug‘dirmasligi kerak. Balki amerikaliklar neft narxi yetarlicha oshmagan deb hisoblayotgandir. Ma’lumot uchun, hozir brent neftining bir bochkasi uchun bozor 106 dollar taklif qilyapti.
Qizchalar xotirlandi
Eronlik futbolchilar madhiya payti nima qilgani yana muhokama markazida. Urush boshlanganda butun dunyo Eron madhiyasini kuylamagan eronlik ayol futbolchilarni muhokama qilgandi, bu gal Eron erkaklar milliy jamoasi futbolchilari muhokama markazida bo‘ldi. Antalyada Nigeriyaga qarshi o‘rtoqlik o‘yinida maydonga tushgan eronliklar mamlakat madhiyasi ijro etilayotganda Amerika aviazarbasi sabab halok bo‘lgan o‘quvchi qizlar xotirasiga hurmat ko‘rsatib, qiz bolalar portfelini ko‘tarib turishdi.
Albatta, eronlik futbolchilar urush ichidagi mamlakati madhiyasini Gattuzo, Buffon, Bonuchchi kabi kuylagani yo‘q, ba’zi futbolchilar xohlamaygina og‘iz qimirlatib turdi. Katta ehtimol bu aksiya Eron hukumati tomonidan amalga oshirilgan. Shunday bo‘lsa-da, qonli urush qurboni bo‘lgan maktab o‘quvchilarini bunday xotirlash juda ta’sirli bo‘ldi.
«Bu NATOning urushi emas»
Amerika eng yaqin ittifoqchisi Isroil bilan birga Eronda urush boshlaganidan keyin prezident Tramp NATO Amerikaga yordam bermayotganiga ko‘p urg‘u beryapti. Yaqinda yana shu haqda gapirgan Tramp «Bizga NATOdan hech narsa kerak emas, lekin hech narsani unutmaymiz», dedi.
