BAA havo hududini to‘liq ochganini e’lon qildi

Dubay xalqaro aeroporti faoliyatining to‘xtab qolishi amirlik iqtisodiyoti uchun daqiqasiga taxminan million dollarga tushgani aytilmoqda.

Foto: REUTERS / Abdel Hadi Ramahi

Birlashgan Arab Amirliklari o‘z havo hududini to‘liq ochdi. Bu haqda 2 may kuni mamlakat Fuqaro aviatsiyasi bosh boshqarmasi ma’lum qildi.

Xabarda aytilishicha, BAA havo hududidan vaqtinchalik xavfsizlik cheklovlari olib tashlangan va parvozlar boshqaruvining odatiy rejimiga qaytilgan.

Parvozlarning maksimal darajada xavfsizligini ta’minlash uchun vaziyat doimiy monitoring qilib boriladi, deyiladi rasmiy axborotda.

Yaqin Sharqda, xususan BAAda aviatsiya tarmog‘i joriy yil 28 fevralda, AQSh va Isroil Eronga hujum boshlagani hamda Tehronning javob zarbalari tufayli izdan chiqqan edi.

Urush tufayli Fors ko‘rfazida joylashgan qator davlatlar muayyan vaqt mobaynida havo hududini fuqaro aviatsiyasi uchun to‘liq yopishiga to‘g‘ri keldi.

NDTV World baholashlariga ko‘ra, Dubay xalqaro aeroporti faoliyatining to‘xtab qolishi amirlik iqtisodiyoti uchun daqiqasiga taxminan 1 mln dollarga tushadi.

Aviakompaniyalar va mehmonxonalar ko‘rayotgan zararni ham jamlaganda, beqarorlik tufayli BAA iqtisodiyoti jiddiy yo‘qotishlarga uchradi.

Tayyorlagan Комрон Чегабоев

#BAA #Dubay

Eron yadro dasturi bo‘yicha muzokaralar rasman tugamay turib, 2026 yil 28 fevral kuni AQSh va Isroil Eron hududiga zarbalar bera boshladi. Prezident Donald Tramp hujumlardan maqsad Tehrondagi rejimni ag‘darish ekanini e’lon qildi.