Toshkentda advokat 2 ming dollar olayotganda ushlandi

Davlat xavfsizlik xizmatining Toshkent shahar bo‘yicha boshqarmasi hamda Iqtisodiy jinoyatlarga qarshi kurashish departamentining shahar boshqarmasi xodimlari hamkorligida o‘tkazilgan tezkor tadbirda poytaxtda faoliyat yurituvchi advokatlar hay’ati a’zosi ushlandi.

Ma’lum qilinishicha, muqaddam sudlangan advokat Shayxontohur tuman IIO FMB TB ish yurituvidagi Jinoyat kodeksining 168-moddasi bilan qo‘zg‘atilgan jinoyat ishi bo‘yicha dastlabki tergov jarayonida gumonlanuvchiga nisbatan “qamoq” ehtiyot chorasi qo‘llanmasligi masalasini mansabdor tanishlari orqali “hal qilib berish”ni va’da qilgan.

Tezkor tadbir davomida u firibgarlik yo‘li bilan 2 ming AQSh dollari olgan vaqtida ashyoviy dalillar bilan ushlangan.

Hozirda unga nisbatan Jinoyat kodeksining 168-moddasi 3-qismi “v” bandi hamda 28, 211-moddasi 1-qismi bilan jinoyat ishi qo‘zg‘atilib, “qamoq” ehtiyot chorasi qo‘llangan.

Tergov harakatlari olib borilmoqda.