Sherzod Kudbiyev: Soliq va kadastr tizimlari birlashuvi natijasida 1 mln.dan ortiq qo‘shimcha obekt aniqlandi

Yig‘ilishda davlat rahbari soliq va kadastr tizimlarining birlashtirilishiga ham e'tibor qaratdi.

«Oldin tumanda BTI degan tashkilot bo‘lardi. Uning boshlig‘i o‘zini hokimdan ham katta tutardi. Notariuslar bilan kelishib, bitta hujjatga muhr urardi, tamom. Ko‘p ishlar bo‘lib ketgan. Hozir unday emas, hammasi o‘zgardi», – dedi prezident.

Yig‘ilish davomida ushbu masalaga Davlat soliq qo‘mitasi raisi Sherzod Kudbiyev ham to‘xtalib o‘tdi.

«Chindan ham soliq va kadastr tizimlarining birlashtirilishidan so‘ng biz ma'lumotlarni solishtirib chiqdik va shu paytgacha 7,6 millionta yer-mulk solig‘i to‘lovchi obektlarga qo‘shimcha yana soliqqa tortish mumkin bo‘lgan 1 millionga yaqin obektlar borligini aniqladik. Albatta, bu dastlabki o‘rganishlarimiz va bu raqam o‘zgarishi mumkin.

Oldimizda 30 trln so‘mlik soliq rejasi bor va bu rejani bajaramiz. Bu mablag‘dan yangi tuzilayotgan jamg‘armalarga 1,2 trln so‘m o‘tkazilishi rejalashtirilgan», – dedi DSQ raisi.