Sharja amirligi xorijlik turistlar uchun ochildi

Sharja amirligi xorijlik turistlarning amirlik hududiga kirishlariga ruxsat berdi, deb yozadi Khaleej Times nashri.

 Qayd etilishicha, turistlar tashrifdan ko‘pi bilan 96 soat oldin koronavirusga topshirgan testi manfiy chiqqani to‘g‘risidagi ma'lumotnomaga ega bo‘lishlari lozim.

 Amirlikka kirib kelganlar qaytadan test topshiradi va natija chiqquniga qadar izolyatsiyaga olinadi.

 Agar test musbat chiqsa, turist o‘z hisobidan 14 kunlik karantinni o‘tashga majbur bo‘ladi. Ushbu qoidani buzganlar jarimaga tortiladi.

 Turistlarda shuningdek, koronavirusdan davolanish xarajatlarini qoplaydigan sug‘urta bo‘lishi kerak. Samolyotda ularga sog‘ligi holati to‘g‘risidagi ma'lumotnomani to‘ldirish taklif etiladi.

 Epidemiologik vaziyatdan kelib chiqib mavjud talablar qayta ko‘rib chiqilishi mumkin, deb yozadi nashr.