Sun’iy intellektdan eng ko‘p foydalanadigan mamlakatlar aniqlandi – O‘zbekiston so‘nggi o‘rinlarda

Microsoft kompaniyasi 2025 yil uchun Global AI Adoption in 2025 hisobotini (.pdf) e’lon qildi, unda odamlar qaysi mamlakatlarda turli xil sun’iy intellekt vositalaridan eng ko‘p foydalanishi ko‘rsatilgan. Reyting kompaniya tomonidan to‘plangan foydalanuvchilar qurilmalaridagi telemetrik ma’lumotlarga asoslanadi.

Birinchi o‘rinni BAA egalladi, u yerda mehnatga layoqatli aholining 64 foizi neyron tarmoqlarni faol qo‘llagan. Singapur 60,9 foiz ko‘rsatkich bilan ikkinchi o‘rinni egalladi. Kuchli uchlikni Norvegiya yakunlab berdi - 46,4 foiz.

Hisobotda qayd qilinishicha, 2025 yil oxirida O‘zbekiston aholisining 6,3 foizi sun’iy intellekt vositalaridan faol foydalangan – bu eng yomon ko‘rsatkichlardan biri. Mamlakat bu borada Kuba, Afg‘oniston, Tojikiston, Turkmaniston va Kambojadan oldinda xolos. Shuningdek, 2025 yil davomida sun’iy intellektdan foydalanuvchilar sonining o‘sishi atigi 0,6 foizni tashkil qilgan.

Sun’iy intellektdan eng ko‘p foydalanadigan Top-10 mamlakatlar:

- BAA – 64 foiz

- Singapur – 60,9

- Norvegiya – 46,4

- Irlandiya – 44,6

- Fransiya – 44

- Ispaniya – 41,8

- Yangi Zelandiya – 40,5

- Niderlandiya – 38,9

- Buyuk Britaniya – 38,9

- Qatar – 38,3

Eng yuqori o‘sishni Janubiy Koreya ko‘rsatdi: bir yil ichida mamlakat birdaniga yetti pog‘onaga - 25-o‘rindan 18-o‘ringa ko‘tarildi. Sun’iy intellektdan foydalanuvchilar ulushi 30,7 foizga yetdi va 2024 yil oxiridan buyon o‘sish 80 foizni tashkil etdi.

Eng ko‘p ChatGPT obunachilari va 120 dan ortiq ma’lumot markazlariga ega kuchli infratuzilmaga qaramay, AQSh atigi 24-o‘rinni egalladi. Hisobot shuni ko‘rsatdiki, aholi soni qancha kam bo‘lsa, raqamlashtirish ulushi shuncha yuqori bo‘ladi, deb ta’kidlamoqda Microsoft.

Microsoft xulosasiga ko‘ra, hozirda dunyodagi har oltinchi odam generativ sun’iy intellekt xizmatlaridan foydalanadi. Bu odamlar hayotida yaqinda paydo bo‘lgan texnologiya uchun hayratlanarli yutuqdir, deya ta’kidladi kompaniya.