Jizzaxda mudhish YTH yuz berdi, to‘rt kishi halok bo‘ldi

Jizzax viloyatining Paxtakor tumanida 8 may kuni mudhish yo‘l-transport hodisasi ro‘y berdi. Bu haqda O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasi xabar qilmoqda.

Qayd etilishicha, Surxondaryo viloyati Muzrabot tumanida yashagan A.Sh. “Neksiya” rusumli avtomashinasini M-39 “Toshkent-Termiz” yo‘lining 953-km.da haydab ketayotib uxlab qolishi oqibatida, yo‘lning marzasida to‘xtab turgan, Toshkent viloyatida yashovchi Sh.B. boshqaruvidagi “MAN” yuk avtomashinasining tirkamasiga urilib to‘qnashuv sodir etgan. 

Natijada “Neksiya” avtomashinasi haydovchisi A.Sh. va uning yo‘lovchisi E.X. jarohat olib voqea joyida hamda qolgan ikki yo‘lovchilari jarohat olib kasalxonaga keltirilganlarida vafot etganlar, shuningdek, yana bir yo‘lovchi  R.O. kasalxonaga yotqizilgan.