Axborot texnologiyalari va kommunikatsiyalarini rivojlantirish vazirligiga yangi rahbar tayinlandi

Axborot texnologiyalari va kommunikatsiyalarini rivojlantirish vazirligini vazirning birinchi o‘rinbosari Sherzod Shermatov boshqarib turadi.

U bugun O‘zbekiston Milliy teleradiokompaniyasiga yangi rais bo‘lib o‘tgan Xurshid Mirzohidovning o‘rniga vazir vazifasini bajaruvchi etib tayinlangan.

Sherzod Shermatov (1977 yilda tavallud topgan) — Toshkent davlat texnika universiteti (1998 yil) va Yyel universiteti (AQSh, 2000 yil) bitiruvchisi.

U o‘tgan yilning noyabrida vazir o‘rinbosari etib tayinlangan, undan oldin Toshkentdagi Inha universiteti rektori lavozimida faoliyat ko‘rsatgan. Ungacha esa Aloqa, axborotlashtirish va telekommunikatsion texnologiyalar davlat qo‘mitasi (hozirgi — Axborot texnologiyalari va kommunikatsiyalarini rivojlantirish vazirligi) raisi o‘rinbosari edi.