Shartnoma doirasida joriy yilning 1 oktyabridan kuniga 9 million kubometr tabiiy gazni import qilish boshlanishi mo‘ljallangan. Yillik hajm esa qariyb 2 milliard 800 million kubometrni tashkil etadi. Shartnoma muddati 2 yil.
Energetika vazirligi joriy yilning 16 iyun kuni Peterburg Xalqaro iqtisodiy forumi doirasida Rossiya gazini O‘zbekistonga yetkazib berish bo‘yicha shartnoma hamda respublikamiz gaz-transport tizimini ushbu gazni qabul qilishga tayyorlash bo‘yicha “yo‘l xaritasi”ga izoh berdi.
Vazirlik xabariga ko‘ra, gaz oldi-sotdisi bo‘yicha shartnoma “UzGasTrade” AJ va “Gazprom eksport” MChJ o‘rtasida 2 yil muddatga tuzilgan bo‘lib, uni ishonchnoma asosida O‘zbekiston energetika vaziri J.Mirzamahmudov va “Gazprom” OAJ boshqaruvi raisi A.Miller imzolagan.
Vazirlik shartnoma to‘liq tijoriy shartlarda ishlab chiqilganini ta’kidlamoqda.
“Respublikamiz iste’molchilarining tabiiy gazga bo‘lgan yildan yilga oshib borayotgan ehtiyojini qisman qondirish hamda kuz-qish mavsumini betalafot o‘tkazishga qaratilgan chora-tadbirlardan biridir. Shartnoma doirasida joriy yilning 1 oktyabridan kuniga 9 million kubometr tabiiy gazni import qilish boshlanishi mo‘ljallanmoqda. Yillik hajm esa qariyb 2 milliard 800 million kubometrni tashkil etadi”, - deyiladi rasmiy xabarda.
Qo‘shimcha qilinishicha, tabiiy gaz narxi mintaqadagi bozor narxlari asosida, shuningdek, respublikadagi amaldagi narxlar hamda ularni bozor tamoyillari asosida shakllantirish bo‘yicha amalga oshirilishi rejalashtirilayotgan islohotlardan kelib chiqib, kelishilgan.
“Yo‘l xaritasi”ga muvofiq, avval tabiiy gaz “O‘rta Osiyo – Markaz” magistral gaz quvuri orqali Qozog‘istondan tranzit bilan Rossiyaga yuborilganligi va endilikda gazning revers rejimida (teskari oqimda) O‘zbekistonga yetkazilishini, shuningdek, respublikamiz hududida yangi gaz o‘lchash stansiyasi qurilishini hisobga olgan holda, belgilangan tadbirlarni joriy yilning sentabr oyiga qadar yakunlash rejalashtirilgan”, - deyiladi xabarda.
“Yo‘l xaritasi” doirasida respublika gaz-transport tizimidagi 3 ta gaz haydash uskunasi yangilariga almashtiriladi va 11 ta turli rusumdagi gaz haydash uskunasida mukammal ta’mirlash hamda tiklash ishlari bajariladi. 22 kilometrlik yangi magistral gaz quvurlari quriladi va 56 kilometrlik gaz quvurlari ta’mirlanadi.
Rossiya bilan gaz bo‘yicha yo‘l xaritasi
2023 yil yanvar oyida O‘zbekiston Energetika vazirligi va “Gazprom” o‘rtasida gaz sohasidagi hamkorlik bo‘yicha “Yo‘l xaritasi” imzolangan edi. Kelishuvda joriy yil mart oyidan boshlab “O‘rta Osiyo – Markaz” quvuri orqali reversiv tartibda Rossiyadan O‘zbekistonga bozor narxida gaz yetkazib berishni boshlash uchun zarur texnik choralar ko‘zda tutilgan edi, lekin muhokamalar ayni paytga qadar davom etmoqda.
Rossiya kompaniyasi shunga o‘xshash shartnomani deyarli bir vaqtda Qozog‘iston bilan ham imzolagan.
Undan avvalroq, 2022 yil noyabr oyida RF prezidenti Vladimir Putin O‘zbekiston va Qozog‘iston bilan birgalikda uch tomonlama gaz ittifoqi tuzishni taklif qilgandi. Lekin O‘zbekiston, Rossiyadan gaz xarid qilinadigan bo‘lsa, bu ittifoq tarzidagi kelishuv asosida emas, oldi-sotdi shartnomasi shaklida bo‘lishini bildirgan.
OAVga sizdirilgan xabarlarga ko‘ra, Rossiya tomoni gaz ittifoqi doirasida O‘zbekiston va Qozog‘istonning gaz uzatish tarmoqlari egaligini qo‘lga olmoqchi bo‘lgan, lekin har ikki mamlakat buni rad etgan.
May oyi oxirida Rossiya tashqi ishlar vaziri o‘rinbosari Mixail Galuzin uch mamlakat gaz ittifoqi loyihasining parametrlarini ishlab chiqayotganini aytgandi.
30 may kuni O‘zbekiston energetika vaziri Jo‘rabek Mirzamahmudov va “Gazprom” raisi Aleksey Miller uchrashuvida RFdan O‘zbekistonga gaz yetkazish masalasi ko‘rib chiqilgandi.
16 iyun kuni Sankt-Peterburg Xalqaro iqtisodiy forumida Rossiya gazini O‘zbekistonga yetkazib berish bo‘yicha shartnoma va respublika gaz uzatish tizimini Rossiya gazini qabul qilishga tayyorlash bo‘yicha “Yo‘l xaritasi” imzolandi.
