Qo‘rg‘ontepada odamlar fast-fuddan zaharlandi. Shifoxonadan reportaj

Tungi soat bir bo‘lishiga qaramay, kasalxona hovlisi gavjum edi. Viloyat va tuman mutasaddilari ham shu yerda ekan.

“6 iyun kuni Qo‘rg‘ontepa tuman markazidagi fast-fud mahsulotlari do‘konida bir necha fuqarolar ovqatlangan va soat 14 larda Qo‘rg‘ontepa tuman tibbiyot birlashmasi yuqumli kasalliklar bo‘limiga 2 nafar bemor ko‘ngil aynishi, bosh og‘rig‘i alomatlari bilan murojaat qilgan. Soat 17 larga borib o‘sha ovqatlanish shoxobchasida taom iste’mol qilgan boshqa bemorlar ham kasalxonaga kelishni boshlagan. 10 nafar bemor aniq og‘riqlar bilan kelgan bo‘lsa, ular bilan birga ovqatlangan oila a’zolari ham o‘zini tekshirtirish uchun kelishdi.

Ayni paytda yuqumli kasalliklar bo‘limiga 27 nafar bemor yotqizilgan. Biz ularni to‘liq nazoratga oldik. Bemorlar orasida ikki nafar 2 va 7 yoshli bolalar ham bo‘lib, ularga alohida kuzatuv holatida muolaja qilinmoqda. Barcha bemorlarning holati stabil. Kasal bo‘lganlarda – ko‘ngil aynishi, bosh og‘rig‘i va ich ketishi holatlari kuzatildi”, - deydi Andijon viloyat sog‘liqni saqlash boshqarmasi boshlig‘i o‘rinbosari Abdukarim Abduvahobov.

Kasallikka sabab bo‘lgan omillarni aniqlash maqsadida FRESH FOOD 2020 oilaviy korxonasiga qarashli ovqatlanish shoxobchasida epidemiologik surishtiruv ishlari olib borilmoqda.

Bu korxonaga qarashli 3 ta ovqatlanish shoxobchasi faoliyati shu kunning o‘zida vaqtinchalik to‘xtatilgan va mahsulotlar tayyorlash xonasi xamda omborxonadagi mahsulotlardan namunalar olinib, laborator tekshirish uchun yuborilgan.

Elmurod Ermatov, Azizbek Ismoilov