Andijon davlat chet tillari instituti qayta tashkil etiladi

“Viloyatda kelgusi besh yilda 1 ming 100 ta davlat, davlat-xususiy sheriklik va oilaviy bog‘chalar tashkil etish hisobiga, maktabgacha ta'lim qamrov darajasi 69 foizdan 78 foizga yetkaziladi. Kelgusi besh yilda 33 ta yangi maktab quriladi, 145 tasi rekonstruksiya qilinadi va kapital ta'mirlanadi.

Shuningdek, 2010 yilda tugatib yuborilgan Andijon davlat chet tillari instituti qayta tashkil etiladi. Bundan tashqari, viloyatda yana 4 ta xususiy oliygoh tashkil etiladi. Natijada, oliy ta'lim qamrovi 23 foizdan 50 foizga oshadi. Davlat-xususiy sheriklik asosida 7 ming o‘rinli 16 ta talabalar turar-joylari quriladi. 

Yoshlarning bo‘sh vaqtini mazmunli tashkil etish borasida ham bir qator ishlar amalga oshiriladi. Jumladan, budjet mablag‘lari hisobidan Andijon shahar, Andijon, Marhamat tumanlarida “Madaniyat markazi” qayta ta'mirlanadi. Bo‘ston tumanida zamonaviy “Yoshlar markazi” qurilib, foydalanishga topshiriladi. Kelgusi besh yilda viloyatdagi 23 ta sport ta'lim muassasalarida qurilish, ta'mirlash va jihozlash ishlari amalga oshiriladi”, dedi prezidentlikka nomzod.