Bahodir Jalolov - Olimpiada chempioni!

8 avgust kuni Tokio Olimpiadasining so‘nggi kunida Bahodir Jalolov (+91 kg) oltin medal uchun jangda amerikalik Richard Torresga qarshi ringga ko‘tarildi.

Jangning birinchi raundi teng kurashlar ostida kechdi, ammo hakamlar bu raundni amerikalik bokschiga berishdi - 2:3.

Ikkinchi raundda esa Jalolov raqibga bosimni oshirdi va bir necha bor xavfli zarbalar yo‘llab, raqibni nokdaun holatiga tushirdi, referi hisobni ochdi, ammo Torres jangni davom ettirishga tayyorligini bildirdi. Bu safar hakamlarning barchasi Jalolovning ustunligini qayd etishdi - 5:0.

Jalolov hal qiluvchi raundda ham faollik ko‘rsatishda davom etib, kuchli zarbalari bilan raqibni qiynab qo‘ydi. Yakunda hakamlar bir ovozdan o‘zbekistonlik bokschining g‘alabasini tan olishdi va Jalolov Olimpiadaning oltin medalini qo‘lga kiritdi.

Bu O‘zbekiston boks jamoasining Olimpiadadagi yagona medali bo‘ldi.

Ma'lumot uchun, ushbu bokschilar 2019 yilgi jahon chempionati chorakfinalida ham ro‘baru kelgan, o‘shanda Torres birinchi raundda kuchli zarbani o‘tkazib yuborib, hushdan ketgan, uni ringdan zambilda olib chiqib ketishgandi.

Jalolov finalgacha bo‘lgan yo‘lda ozarboyjonlik Magomed Abdullayev, hindistonlik Satish Kumar va britaniyalik Freyzer Klarkni mag‘lub etgandi.

Bu O‘zbekiston delegatsiyasi uchun Tokio Olimpiadasidagi beshinchi medal bo‘ldi. Bungacha taekvondochi Ulug‘bek Rashidov oltin, dzyudochi Davlat Bobonov bronza, og‘ir atletikachi Akbar Jo‘rayev oltin va erkin kurashchi Bekzod Abdurahmonov bronza medalga ega chiqqandi. 

Olimpiada yakunlariga ko‘ra, O‘zbekiston delegatsiyasi 3ta oltin va 2 bronza bilan umumiy reytingda 31-o‘rinni egalladi.