1 iyun kuni munosabati bilan barcha bolalar uchun 200 ming so‘mdan tarqatilishi to‘g‘risidagi xabarlar rad etildi

Ijtimoiy tarmoqlarda O‘zbekiston prezidenti tomonidan 1 iyun — Xalqaro bolalarni himoya qilish kuniga sovg‘a sifatida barcha bolalarga 200 ming so‘mdan pul berilishi to‘g‘risida xabarlar tarqaldi. Telegram’dagi «Antifake.uz» kanalining yozishicha, mazkur xabarlar haqiqatga mos kelmaydi.

«Mazkur xabarlar yolg‘on va haqiqatga mos kelmaydi. Aholi o‘rtasida yolg‘on axborot tarqatganlik uchun javobgarlik mavjud», — deyiladi munosabatda.

Pensiya jamg‘armasi direktori Abdulaziz Haydarov ham OAV vakillari bilan uchrashuvda ijtimoiy tarmoqlarda barcha fuqarolarga 200 ming so‘mdan pul tarqatilayotgani haqida tarqalgan yolg‘on xabarlarga ishonmaslikka chaqirdi.

Uning ma’lumotiga ko‘ra, bugungi kungacha respublika bo‘yicha ijtimoiy himoyaga muhtoj qatlamga mansub kishilarning 65 foiziga Xalq bankining tegishli sayyor kassalari orqali mablag‘lar (300 va 400 ming so‘mdan) tarqatilgan. Ikki hafta ichida pensiya va nafaqa oluvchi 4,2 milliondan ortiq kishiga (100 foiz) yuqoridagi mablag‘lar yetkazib berilishi rejalashtirilgan.

Bundan tashqari, kam ta’minlangan oilalarning 18 yoshga to‘lmagan farzandlari uchun (4,7 million) 200 ming so‘mdan tarqatilmoqda. Bunday yordam oluvchilarning jami soni 9 millionga yaqinni tashkil etadi.

Eslatib o‘tamiz, 25 may kuni «Aholining ijtimoiy himoyaga muhtoj qatlamlarini manzilli qo‘llab-quvvatlashga oid qo‘shimcha chora-tadbirlar to‘g‘risida»gi prezident qarori imzolangandi. Unga ko‘ra, davlat budjeti mablag‘lari hisobidan ijtimoiy himoyaga muhtoj aholining bir qator qatlamlariga bir martalik moddiy yordam ko‘rsatiladi.

Jumladan, yoshga doir, nogironlik pensiyasi va nafaqasini oluvchilarga, bolalikdan nogironlik nafaqasini hamda boquvchisini yo‘qotganlik pensiyasini va nafaqasini oluvchi har bir oila a’zosiga hamda o‘zgalar parvarishiga muhtoj nogironligi bo‘lgan 18 yoshgacha bolalarning parvarishlash nafaqasini oluvchilarga:

• Qoraqalpog‘iston Respublikasi va viloyatlarda – 300 ming so‘mdan;
• Toshkent shahrida – 400 ming so‘mdan.

«Ijtimoiy himoya yagona reyestri» axborot tizimi orqali kam ta’minlangan sifatida moddiy yordam oluvchi oilalarga hamda kam ta’minlangan sifatida bolalar nafaqasini oluvchi oilalarning har bir 18 yoshga to‘lmagan bolasiga – 200 ming so‘mdan beriladi.