Bolalar nafaqasi va moddiy yordam to‘lash tartibi yangilandi

Farmonga muvofiq, Ijtimoiy reyestrdagi oilalarga bolalar nafaqasi va moddiy yordam quyidagi tartibda to‘lanadi:

1) “Davlat ta’minotidagi oila”

Ijtimoiy xizmat va yordamlar (shu jumladan, bolalar nafaqasi va moddiy yordam) oila ushbu toifada bo‘lgan davrda oilaning bandlik holatidan qat’i nazar va qo‘shimcha murojaat talab etmasdan ko‘rsatib boriladi.

Oilaning ijtimoiy-iqtisodiy holati Ijtimoiy reyestrga kiritilganidan 12 oy o‘tgach qayta baholanadi (ayrim hollarda vazirlik va idoralar axborot tizimlari orqali o‘rganilishi mumkin).

2) “Kambag‘al oila”

Bolalar nafaqasi yoki moddiy yordam tayinlangan vaqtdan e’tiboran 6 oy davomida mehnatga layoqatli a’zolarning rasmiy bandligi ta’minlanishi sharti bilan tayinlanadi.

Agar mehnatga layoqatli a’zolarning rasmiy bandligi ta’minlansa, nafaqa/yordam qo‘shimcha murojaatsiz uzluksiz to‘lab boriladi.

Agar rasmiy bandlik sharti bajarilmasa, bolalar nafaqasi va moddiy yordam to‘lash to‘xtatiladi.

Oila qayta murojaat qilganda, “kambag‘al oila” toifasida bo‘lgani uchun mehnatga layoqatli a’zolar bandligiga oid istisno qoida 6 oy davomida qo‘llanmaydi.

3) “Kambag‘allik chegarasidagi oila”

Bolalar nafaqasi yoki moddiy yordam oila ushbu toifaga kiritilgan vaqtdan e’tiboran 6 oy davomida to‘lanadi.

Agar har bir a’zoga to‘g‘ri keladigan o‘rtacha oylik daromad minimal iste’mol xarajatlarining 1 baravaridan 1,25 baravarigacha bo‘lsa — to‘lov 75 foiz qilib belgilanadi.

Agar daromad 1,25 baravaridan 1,5 baravarigacha bo‘lsa — to‘lov 50 foizni tashkil etadi.