Yakkabog‘da sodir bo‘lgan voqea, tadbirkorning hokim o‘rinbosari o‘tirgan ekskavatorga benzin sepib, yoqib yuborishi juda ko‘plab savollarni yuzaga keltirmoqda. Ulardan birinchisi — bu ko‘ngilsizlik hududda tasodifan yuz berdimi yoki voqealar rivojlanib pishib yetilganmidi?
Ana shunday holat bo‘lgani holda hududda o‘ttizga yaqin tadbirkorning binolari buzib tashlandi. Buzilganda ham, evaziga hech qanday kompensatsiya to‘lanmasdan! Bor-budini shu do‘konlarga tikkan, ro‘zg‘ori va bola-chaqasining kuni o‘tishi shu do‘konlarga qarab turgan tadbirkorlarda, tabiiyki, keskin norozilik paydo bo‘lgan. Ulardan biri — tadbirkor Bahriddin Isomov edi.
Bu tadbirkorga binosi buzilishi bo‘yicha kelgan rasmiy hujjatning imzolangan sanasiga oldingi maqolada to‘xtalib o‘tdik — 2019 yil 20 iyul. Tadbirkorning yaqinlari hokimlik vakillari ogohlantirish xatini voqeadan bir kun o‘tib keltirishganini tasdiqlashmoqda. Shu sababdan, ekskavator kelgan kuni binoning yuqori qavatida ishchilar bo‘lgan, yerto‘lada esa qariyb 100 million so‘mlik mahsulotlar turgan.
Bir holatga alohida to‘xtalishni istardik: B.Isomovning buzilishga tushgan binosi jami 84 kvadrat metrdan iborat. Ana shu ixcham ikki qavatli binoda u 6 kishini ish va doimiy daromad bilan ta'minlagan. Kamchiligi esa u kadastr hujjatlariga ega bo‘lmagan.
Tadbirkorning o‘g‘li Sh.Daminovning aytishicha, o‘z vaqtida kadastr hujjatlari bino qurib bitkazilgach tayyorlab berilishi va'da qilingan. Bino qurib bitkazilgach, esa mana bu voqealar boshlanib ketgan.
Umuman, gap tadbirkorning qo‘lidagi hujjat kamchiligida ham emas, chunki barcha hujjatlarga ega bo‘lgani holda do‘konlari buzilgan boshqa tadbirkorlar ham kompensatsiya olishmagan.
Tuman hokimligi axborot xizmati rahbarining aytishicha, «Eski Yakkabog‘» mahallasi «Obod qishloq» dasturi asosida obodonlashtirilib, yuqoridagi ko‘chadan 10 kilometr ichimlik suv tarmog‘ining bir qismi o‘tadi. Shuningdek, avtoturargoh ham quriladi.
