Ispaniyadagi teraktlarda 34 mamlakat fuqarosi halok bo‘ldi va jabrlandi

Barselona va Kambrilsdagi teraktlar natijasida 34 mamlakat fuqarolari halok bo‘ldi va jarohatlandi. Bu haqida Kataloniyaning favqulodda vaziyatlar xizmati xabar berdi. 

"Ma'lumotlarga ko‘ra, Barselona va Kambrilsdagi teraktlarda halok bo‘lgan va jarohat olganlar 34 mamlakat fuqarolari bo‘lgan", - deyiladi Kataloniya favqulodda vaziyatlar xizmatining Twitter'dagi   xabarida.  

Idora ma'lumotlariga ko‘ra, bu ro‘yxatga quyidagi mamlakatlar fuqarolari kirgan: Ispaniya, Germaniya, Jazoir, Argentina, Avstraliya, Avstriya, Belgiya, Marokash, Kanada, Xitoy (va Tayvan), Kolumbiya, Ruminiya, Venesuela, Kuba, Ekvador, Misr, AQSh, Filippin, Fransiya, Britaniya, Gretsiya, Niderlandiya, Honduras, Vengriya, Irlandiya, Italiya, Kuvayt, Makedoniya, Mavritaniya, Pokiston, Peru, Dominikan Respublikasi, Turkiya. 

Kuni kecha Barselona markazi hamda Kambrils shahrida avtomobillar odamlar ustiga bostirib borgan. So‘nggi ma'lumotlarga ko‘ra, umumiy hisobda 14 kishi halok bo‘lgan, 100 nafardan ortig‘i jarohat olgan. Barselonadagi terakt ijrosi uchun javobgarlikni IShID o‘z zimmasiga olgan. Hozirga qadar politsiya bir necha gumondorni qo‘lga olgan, Barselonada yo‘lovchilar ustiga bostirib borgan avtomobil haydovchisi qidiruvlari davom etmoqda.