Telman Ismoilov Putinga xat yozganini rad etdi

Moskvadagi «Cherkizovskiy» bozorining sobiq egasi Telman Ismoilov Rossiya prezidenti Vladimir Putinga maktub yozgani haqidagi ma'lumotlarni inkor etib chiqdi. Bu haqda RBK xabar bermoqda.

U bu ma'lumotni provokatsiya deb atadi.

«Sizga shuni aytmoqchimanki, bunday maktub yo‘q va bo‘lishi ham mumkin emas. Qolgan hammasi - yolg‘on», - deya ma'lum qildi Ismoilov.

Avvalroq, qator OAV huquqni muhofaza qilish organlaridagi manbalarga tayangan holda Ismoilov Putinga maktub yozgani haqida xabar bergandi. Unda aytilishicha, «sobiq hamkorlar unga qarshi hujum boshlab, moliyaviy ahvoliga jiddiy zarar yetkazishdi».

Shuningdek, Ismoilov Rossiyada o‘ziga qarshi ochilgan jinoiy ishlarni izohladi. Uning so‘zlariga ko‘ra, barcha jinoiy ishlar yolg‘on ma'lumot ortidan qo‘zg‘atilgan. Bundan avval Rossiya Tergov qo‘mitasi tadbirkor Telman Ismoilovni qotillikda ayblab, qamoqqa olish tarzida ehtiyot choralarini tanlagandi.