«Hunarmand» uyushmasi xususiylashtirishda yordam beradi

Vazirlar Mahkamasining 7.03.2018 yildagi 186-son qarori bilan ayrim qonun hujjatlariga hunarmandlarni qo‘llab-quvvatlashga doir tuzatishlar kiritildi, deb yozmoqda Norma.

Eslatib o‘tamiz, Prezidentning 17.11.2017 yildagi PF–5242-son Farmoni bilan hunarmandlarga turli imtiyoz va preferensiyalar taqdim etilgan, xususan ularning davlat mulkini soddalashtirilgan tartibda xususiylashtirish chora-tadbirlari nazarda tutilgan.

Qabul qilingan hujjatda hunarmandlarning davlat obektlarini sotib olishi, shuningdek «nol» xarid qiymati bo‘yicha sotib olishining aniq tartibi belgilangan. Vazirlar Mahkamasining 6.10.2014 yildagi «Davlat mulki obektlarini xususiylashtirish tartibi to‘g‘risidagi nizomlarni tasdiqlash haqida»gi 279-son qaroriga tegishli qo‘shimchalar kiritildi.

Shunday qilib, hunarmand kamida 5 yil mobaynida faqat hunarmandchilik faoliyatini amalga oshirish uchun to‘g‘ridan-to‘g‘ri oldi-sotdi shartnomasi bo‘yicha davlat ko‘chmas mulk obektini sotib olishi mumkin. Buning uchun uning buyurtmanomasi va «Hunarmand» uyushmasining iltimosnomasi zarur. Bunda obektni sotuvga qo‘yish to‘g‘risidagi e'lon OAVda berilishi mobaynida u hunarmandga sotilishi mumkin. Bir nechta hunarmandlar obektga ega bo‘lish istagini bildirgan taqdirda, bu obekt ushbu hunarmandlar ishtirokidagi ochiq savdolar orqali sotiladi.

Obektni xususiylashtirish to‘g‘risidagi ariza bo‘lmasa yoki hunarmand oldi-sotdi shartnomasini tuzishni rad etsa, ushbu obekt tanlov o‘tkazish yo‘li bilan sotiladi.

Davlat mulki obektlari to‘g‘ridan-to‘g‘ri muzokaralar o‘tkazish orqali xuddi shunday tartibda «nol» xarid qiymati bo‘yicha hunarmandlarga sotiladi.

Hujjat 9.03.2018 yildan kuchga kirdi.