Россия Украина бўйича 20 банддан иборат тинчлик режасини рад этди

Кремл Украина президенти Володимир Зеленский илгари тақдим этган 20 банддан иборат қайта ишланган тинчлик режаси лойиҳасини қабул қилмади ва уни ўзгартиришни талаб қилмоқчи, деб хабар берди Bloomberg агентлиги 24 декабр куни Россия раҳбариятига яқин манбага таяниб.

Агентлик суҳбатдошининг сўзларига кўра, ҳужжат Москвада кейинги музокаралар учун «бошланғич нуқта» сифатида кўрилади, бироқ у «бир қатор қоидаларни ўз ичига олмайди ва Россия томони принципиал деб ҳисоблаган кўплаб саволларга жавоб бермайди». Хусусан, Кремл Украина Қуролли кучлари учун чекловларни кучайтиришга эришмоқчи.

Манбанинг таъкидлашича, Россия НАТОнинг шарққа силжиши олдини олиш кафолатларини, шунингдек, Украина Европа Иттифоқига қўшилган тақдирда нейтрал мақомини мустаҳкамлашни талаб қилмоқда. Унинг сўзларига кўра, тақдим этилган лойиҳада Киевнинг фақат ядро қуролисиз мақоми тилга олинган.

Москва, шунингдек, Украина Қуролли кучларининг урушдан кейинги сонини чеклаш бўйича таклифлардан норози. Лойиҳага кўра, гап тинчлик даврида 800 минг аскарлик чеклов ҳақида кетмоқда, Кремл буни жуда юмшоқ шарт деб ҳисоблайди. Бундан ташқари, Россия Украинада рус тили мақомининг аниқ кафолатларини, шунингдек, санкцияларнинг бекор қилиниши ва Ғарбда музлатилган Россия активларининг тақдири масаласига ойдинлик киритишни талаб қилмоқда.

Ҳужжат танқид қилинганига қарамай, Россия ҳукумати уни бутунлай рад этиш ниятида эмас. Bloomberg таъкидлаганидек, Москва АҚШ президенти Доналд Трамп билан муносабатларни кескинлаштирмоқчи эмас ва «совуққонлик билан» таклифларни ўрганишга тайёрлигини билдирмоқда.

24 декабр куни Володимир Зеленский Россия билан урушни тугатиш режасининг барча 20 та бандини тақдим этди. Ҳужжат Москва ва Киев ўртасида тўқнашув чизиғининг халқаро мониторинги билан ҳужум қилмаслик тўғрисида битим тузишни, шунингдек, Шимолий Атлантика алянси Низомининг бешинчи моддаси намунаси бўйича АҚШ, НАТО ва Европа давлатлари томонидан Украинага хавфсизлик кафолатларини тақдим этишни назарда тутади.

Бундан ташқари, лойиҳада Россия томонидан Украина ва Европага ҳужум қилмаслик сиёсатини қонунчилик билан мустаҳкамлаш зарурлиги айтилган. Шу билан бирга, келишувда Украина суверенитети аниқ қайд этилган.

Асосий масалалардан бири - ҳудудий масала ҳал этилмаган. Киев таклифига кўра, Россия Днепропетровск, Николаевск, Суми ва Харков вилоятларидан қўшинларини олиб чиқиши керак. Донецк, Луганск, Запорожие ва Херсон вилоятларида ҳозирги фронт чизиғини «қаерда турган бўлсак, шу ерда қоламиз» тамойили бўйича қайд этиш таклиф қилинмоқда.

Москва, ўз навбатида, Украина Қуролли кучларини Донецк вилоятидан олиб чиқишни талаб қилмоқда. АҚШ эркин иқтисодий зонани ташкил этиш кўринишидаги муросали вариантни таклиф қилмоқда. Лойиҳага кўра, бундай вариант фақат Украинада референдум ўтказилгандан сўнг мумкин бўлади, унга барча келишувлар тўплами киритилиши керак.