«Насаф»ни ютганга мукофот! Суперлигада интрига авжида

Бугун футбол бўйича Ўзбекистон чемпионати ҳақида гаплашамиз. Яна тўрт тур ўйинларидан кейин чемпион номи аниқланади. Чемпионлик учун асосий даъвогар «Нефтчи» ниҳоят «Насаф»дан ўзиб кетди. Рўзиқул Бердиев жамоаси ҳам кетма-кет чемпионликдан умид узгани йўқ. «Пахтакор» эса икки фаворитни зимдан кузатиб, охирида чемпионликни илиб кетиши мумкин. Қуйида шу ҳақда.

{Yii::t(}

Ўтказиб юбориш 6s

Ўтказиб юбориш

Асосий фаворит – «Нефтчи»

Чемпионат бошланишидан аввалроқ ғолиблик учун асосий даъвогар «Нефтчи» экани аниқ эди. Чунки Фарғона клуби мавсум оралиғида «олди-орқасига қарамай» кучли трансферларни амалга оширди. Таркибда шунчалик футболчи кўпайиб кетдики, Зоран Марушич ва Владимир Йовович каби бошқа клублар орзу қиладиган легионерлар захирада қолиб кетди. Давралар оралиғида шунча футболчи устига клуб Кожо Жоэл, Алишер Одилов ва Силванус Нимели каби кучли ҳужумчиларни сотиб олди.

«Бунақа таркиб билан чемпион бўлмаслик уят», дея бошлади мухлислар. Мавсум охирига келиб тожиккистонлик Виталий Левченко мураббийлигидаги «Нефтчи» чиндан енгилмас жамоага айланди: охирги ўнта ўйиндан тўққизтасини ютди, охирги марта фақат Тошкентда «Пахтакор»га ютқазди. «Нефтчи» сўнгги ўйинларда гол ҳам ўтказмаяпти.

26-турда «Нефтчи» Ғузорда аутсайдер «Шўртан»ни енгди, амалдаги чемпион «Насаф» Олмалиқда очко йўқотди. Ҳозир икки жамоанинг очколари тенг, лекин қўшимча кўрсаткичларга кўра фарғоналиклар биринчи ўринга кўтарилди.

Шу ерда бир гапни айтиб ўтмасак бўлмайди. «Нефтчи» жуда кўп трансферлар қилди, кучли легионерлар олиб келди, лекин жамоага натижа қилиб бераётган энг асосий футболчи ўзбек футболининг такрорланмас плеймейкери Жамшид Искандеров бўлмоқда. Тўғриси, «Нефтчи» ўйини Левченконинг услубига хос тарзда ҳимояга асосланган, жамоа чиройли, ҳужумкор ўйин кўрсатиши билан мақтана олмайди. Лекин мана шундай «ёпиқ жамоада» Жамшиддек топ футболчи борки, биргина узатма билан ўйин тақдирини ҳал қилиб юборяпти. Бундай йигитлар борлиги футболимиз учун катта омад аслида.

Тақвим: яна «Нефтчи» устун

Суперлигада жамоалар яна тўрттадан ўйин ўтказади. «Динамо» ва «Андижон»нинг қолганлардан битта кўпроқ ўйини бор. Келинг, «Насаф» ва «Нефтчи»нинг кейинги ўйинларини таққосласак. Тўғрисини айтиш керак, кейинги ўйинларда «Нефтчи»нинг имконияти яхшироқ, чунки Левченко жамоаси тақвимнинг энг мураккаб қисмидан кетма-кет ғалабалар билан чиқиб кета олди.

«Нефтчи» кейинги турда «Сурхон»ни қабул қилади, 28-турда Бухорога боради, кейин «Қизилқум»ни қабул қилади ва турнирни «Хоразм»га қарши меҳмондаги ўйин билан якунлайди.

«Насаф»нинг кейинги рақиблари бироз жиддийроқ: меҳмонда «Навбаҳор», Қаршида «Машъал», Тошкентда «Пахтакор» ва охирги тур Қаршида «Динамо». Орада қаршиликлар Элит Осиё чемпионлар лигаси ўйинларида ҳам қатнашиши ҳисобга олинса, Бердиевда ротация қилиш имкони ҳам деярли бўлмайди.

«Насаф»ни ютганга – мукофот!

Футбол журналистлари орасида охирги вақтларда кўп муҳокама қилинаётган мавзулардан бири «Нефтчи» чемпионлик йўлида «Насаф»нинг рақибларига мукофот пули таклиф қилаётганидир. Бу аслида янгилик ҳам эмас, жаҳон футболида ҳам чемпионлик учун курашаётган жамоалар рақибини ютганда мукофот таклиф қилади. Олмалиқда ОКМК билан дуранг ўйнаганидан кейин «Насаф» бош мураббийи Рўзиқул Бердиев ҳам шунга ишора қиладиган гап айтди.

Фарғона вилоят ҳокими Хайрулла Бозоров бу мавсум «Нефтчи» чемпион бўлишини жуда истаётгани сир эмас. Бошқа вилоятларда ошиб борса клуб ҳомийлари ўйинни махсус меҳмонлар жойидан кузатса, Хайрулла Бозоров бутун бошли Фарғона раҳбарилигидан ортиб, «Нефтчи»нинг деярли ҳамма ўйинини стадиондан томоша қиляпти. Бу борада Бозоровга фақат Наманган ҳокими Шавкат Абдураззоқов рақобат қилиши мумкин эди. Бироқ Шавкат Шокиржонович шунча шароит яратиб берган бўлса-да, «Навбаҳор» бу йил чемпионлик учун кураша олмади.

Демак, «Нефтчи» «Насаф» рақибларига пул таклиф қилиши ҳақидаги миш-мишга қайтсак. Менимча, охирги турларда фарғоналикларнинг бу борада асраб қўйган пуллари ёнида қолса керак. Чунки «Насаф»нинг кейинги рақиби «Навбаҳор». Наманган клуби ўла қолса ашаддий рақиби «Нефтчи»дан пул олмайди. «Насаф»нинг яна икки рақиби «Пахтакор» ва «Динамо» учинчи ўрин учун курашда, «Пахтакор» чемпион бўлиши ҳам мумкин, шу боис уларга пул таклиф қилишдан мантиқ йўқ, шундоғам «Насаф»ни ютишга ҳаракат қилишади. «Машъал»га эса «Насаф» билан ўйиндаги ғалаба учун пул таклиф қилишдан фойда йўқ. Шахсан менинг фикримча, Бердиев чемпион йўлида бунақа ўйинларда хато қилмайди.

Ана шунақа гаплар, азизлар. Чемпионатимиз даражаси шунчалик баланд бўлдики, жамоалар чемпионлик учун ҳамма ишни қилишга интилмоқда. Чунки ҳозир чемпион бўлмасангиз, иккинчи ўриндан ҳеч қандай наф йўқ. Осиё чемпионлар лигасида Ўзбекистондан фақат чемпион ва кубок соҳиби ўйнайди.

Чемпионатнинг охирги турларини кузатиб боришни тавсия қиламан. Мавсум якунида «Нефтчи» чорак аср ўтиб яна чемпион бўлиши, «Динамо» клуб тарихида илк марта совриндор бўлиши, «Насаф» кетма-кет иккинчи марта чемпион бўлиши ёки чемпион бўлишни ҳаммадан яхши биладиган «Пахтакор» барчани доғда қолдириб, камбэк қилиши мумкин. Дарвоқе, эртага Андижонда Ўзбекистон кубоги финал ўйини бор. Бу ўйинда ҳам тарих яратилиши мумкин. Финалда амалда кубок соҳиби бўлган мураббий Александр Хомяков бошчилигидаги «Бухоро» дебют қилади. Хуллас, бу ёғига ўзбек футболида ҳам ажойиб ўйинлар кутиб турибди.

Ўткир Жалолхонов тайёрлади.
Тасвирчи ва монтаж устаси – Фахриддин Ҳотамов.