«Пахтакор» Суперлигада иккинчи, «Насаф» учинчи ўринни эгаллади

Футбол бўйича Ўзбекистон Суперлигасининг барча совриндорлари аниқланди.

29 ноябр куни 30-тур доирасида пешқадам клубларнинг ўйинлари ўтказилди.

«Пахтакор» сафарда «Навбаҳор» билан ўйнади ва ярим соат давомида бир футболчи кам бўлиб ҳаракат қилганига қарамай, 1:1 ҳисобида дурангга эришди. Бу тошкентликларга 60 очко билан иккинчи ўринни эгаллаш имконини берди. «Пахтакор» 7-марта кумуш медалга эга чиқди.

«Насаф» ўз майдонида «Динамо» билан ўйнади. Бу ўйинда ҳисоб очилмади. Натижада «Насаф» 59 очко билан чемпионат жадвалида учинчи бўлди. Қарши клуби ўз тарихида 12-марта бронза медалига эга чиқди. «Динамо» 58 очко билан тўртинчи ўринда қолди.

Эслатиб ўтамиз, Фарғонанинг «Нефтчи» клуби чемпионликни муддатидан олдин, аввалги турда қўлга киритган эди. Шунингдек, Ғузорнинг «Шўртан» клуби Суперлигадан муддатидан олдин тушиб кетган эди.

30-тур ўйинлари эртага давом эттирилади ва Суперлигада қолиш учун курашувчи «Бухоро» ва «Хоразм» клубларининг плей-оффдаги рақиблари аниқланади. «Хавфли» зонада «Сурхон», «Андижон», «Қўқон-1912» ва «Машъал» клублари бормоқда. Регламентга кўра, 12-15 ўринларни эгаллаган клублар плей-офф баҳсларида иштирок этади.