Путин яқинда аэродромларга уюштирилган ҳужумларга жавоб қайтаришга мажбурлигини айтди – Трамп

АҚШ президенти Доналд Трамп Россия президенти Владимир Путин билан телефон орқали мулоқот қилганини айтди. Унинг сўзларига кўра, суҳбат 1 соат 15 дақиқа давом этган.

Трамп ва Путин Украинанинг Россия аэродромларига ҳужумини, шунингдек, ҳар икки томон амалга оширган «бошқа ҳужумлар»ни муҳокама қилган.

«Бу яхши суҳбат бўлди, лекин зудлик билан тинчликка олиб келадиган суҳбат эмас», деди АҚШ президенти.

Суҳбатда Россия президенти «аэродромларга яқинда уюштирилган ҳужумларга жавоб беришга мажбур бўлишини» «жуда қатъий» айтган.

Трамп ва Путин Эрон ва ядровий қуроллар масаласини ҳам муҳокама қилган.

«Президент Путинга Эрон ядро қуролига эга бўлолмаслигини айтдим ва ўйлайманки, биз бу борада якдил фикрдамиз. Путин Эрон билан музокараларда қатнашишни ва эҳтимол, ечим топишда ёрдам беришни таклиф қилди», деди АҚШ раҳбари.

Кремль ҳозирча суҳбат бўйича ўз версиясини тақдим этмади.

Доналд Трамп АҚШ президенти лавозимига қайтганидан кейин Владимир Путин билан тўртинчи марта телефон мулоқотини ўтказди. Бунгача улар 19 май куни суҳбатлашди. Шундан сўнг, Трамп Украина, Буюк Британия, Франция, Германия, Италия, Финляндия ва Еврокомиссия раҳбарлари билан мулоқот қилди. Хабар қилинишича, улар Путин ва Трамп ўртасидаги келишувлар тавсифидан «ҳайратда қолган». Суҳбат мазмуни ҳақида хабар берилмади.