“Қўлингдан битта жакет сотволиш келмайдими, уятсизлар...” — ТДПУда форма киймаган талабалар босимга учради

Тошкент давлат педагогика университетида талабалар ягона форма кийишга мажбурланиши давом этяпти. Kun.uz'га юборилган аудиога кўра, декан ўринбосари дарс тугагач аудиторияларга кириб, талаб қилинган дизайндаги формани сотиб олиш ва кийиш бўйича босим ўтказган.

Kun.uz'га Низомий номидаги Тошкент давлат педагогика университети талабалари форма кийишга мажбурланаётгани айтилган аудио келиб тушди. Мурожаатчиларга кўра, “замдекан” дарс тугагач талабалар олдига кириб, уларга босим ўтказган.

Тақдим этилган аудиодаги овоз Педагогика ва психология факултети ёшлар масалалари ва маънавий-маърифий ишлар бўйича декан ўринбосари Феруза Йўлдошева экани айтилмоқда.

“Менга размер-пазмер қилмаларинг. Ким форма олди, қўлини кўтарсин. Олганлар... Нимага киймагансизлар? Кий устингга. Қолганлар... Қани сеники? А?! Жакетини ўзини бўлса ҳам кий. Мана мен ҳам бошқа юбка билан бўлса ҳам кийиб юрибман-ку, юбкаси катталиги учун.

Нима, сизларга алоҳида таклиф керакми? Ёки катта бўлиб қолдиларингми 2-курсга ўтиб? А?! Ким катта бўлиб қолди, қўлини кўтарсин-чи?

Мен билмайман, размер-пазмер баҳонаси кетмайди. Мана бу ерда [соат] 8 да янги пачка келяпти, сизлар оғзиларингни очиб ўтиргунча бошқа факултет талабалари олиб, кийиб ўтирибди. Сизлар юрибсизлар: “Кирсак, размер йўқ экан”, деб. Шу тикувчи ёки сотувчининг рақамини олволса бўладими?! Келган заҳоти телефон қилиб, тушиб оламан, деса бўладими?!

Эплаганлар олиб, ўтирибди-ку! Қўлингиздан келмайдими битта жакет сотиб олиш? Уятсизлар... Сен агар, тўрталанг, қайтиб қадамингни босмайсан шу аудиторияга, тушундинг-а?” – деган у.

Декан ўринбосари айтилган гаплар сўзсиз бажарилиши кераклиги, муҳокама қилинса, чора кўрилишини айтган.

“Агар менинг гапим муҳокама бўлиб, менинг гапим қилинмайдиган бўлса бу ерда, сен бу жойда ўтирмайсан, Азиза, Нодира. Сен ҳам, Хуршида... Мафтуна, сенга ҳам тегишли. Сенлар ўрнак бўлишинг ўрнига, аҳволингни қара! Сенларга ўрнак бўлиб ўтирибди орқангдагилар! Тушунарлими?!

Топасиз қаердан бўлса ҳам! Керак бўлса, худди шунақа материал олиб, тиктириб олинг, ҳеч ким қаршилик қилмайди. Яхши гапни тенги бўлмаяпсизларми, сизлар билан бошқача гаплашамиз энди. Йиғиштириб олинглар ўзларингни”, – деган у.

Kun.uz аввалроқ бу университетнинг бир гуруҳ талабалари ягона мажбурий форма қилинаётганидан норозилиги, бу талабни бажармаганлар дарсга киритмаслик билан қўрқитилаётгани ҳақида ёзганди.

Ундан аввал университет маъмурияти шу каби эътирозларни рад этиб, талабалар формани ўз хоҳиши билан сотиб олишаётганини билдирган. Олийгоҳ маъмуриятига кўра, ягона форма – “кадрларнинг маънан, жисмонан, ақлан етук бўлиши учун” керак.