Шоҳрух Гадоев Озарбойжон клуби билан шартнома имзолади

Тошкентнинг «Бунёдкор» клуби яримҳимоячиси Шоҳрух Гадоев фаолиятини Озарбойжон чемпионатида давом эттиради, дея хабар бермоқда «Azerifootball» сайти.

«Кешли» жамоаси қишки трансферлар кампаниясини бошлади. Тарлан Ахмедов мураббийлигидаги клубнинг дастлабки янги футболчиси ўзбекистонлик футболчи Шоҳрух Гадоев бўлди. 27 ёшли футболчи яримҳимоянинг икки қанотида ҳам тўп суради, миллий жамоаси сафида 12 ўйинда битта голга муаллифлик қилган. Гадоев сўнгги клуби «Бунёдкор» сафида ҳам 10 ўйинда битта гол киритган. «Бунёдкор»гача эса Шоҳруҳ бир йил давомида Жанубий Кореянинг «Тэжон Ситизен» клубида тўп сурган. Ўзбекистонлик футболчи «Кешли» билан 1,5 йиллик шартнома имзолади» - дейилади хабарда.

Маълумот учун, «Кешли» клуби Озарбойжон Премьер-лигасининг 2019/20 йилги мавсуми биринчи қисмини 8 жамоа орасида 3-ўринда якунлади.

Эслатиб ўтамиз, Бокунинг «Кешли» (собиқ «Интер») жамоасида 2018 йилги мавсумда яна бир ҳамюртимиз Баҳодир Насимов тўп сурган.