Ўзбекистонда экотуризм янада ривожлантирилади. “Сўқоқ” бу борада намуна бўлади

Ўзбекистон табиати хақида сўз кетганда, албатта, илиқ гап эшитасиз. Боиси 4 фаслни ўзида жамлаган бу ҳудуд табиати турфа хиллиги, бетакрор манзараси билан кўпчиликнинг ҳайратига сабаб бўлади. Мамлакатимизда сўнгги йилларда экотуризмни ривожлантиришга бўлган эътибор ҳам айни омиллар билан боғлиқ.  

Ўзбекистон Америка Қўшма Штатлари билан кўплаб соҳаларда ҳамкорликни йўлга қўйган. Айниқса, сўнгги йилларда бу тобора мустаҳкамланиб бормоқда. Хусусан, қишлоқ хўжалиги соҳасида ҳам.

Куни кеча АҚШ қишлоқ хўжалиги департаменти ҳамда Ўзбекистон Республикаси Ўрмон хўжалиги давлат қўмитаси ҳамкорлигида Тошкент вилоятининг Паркент туманида жойлашган “Сўқоқ” ўрмон хўжалигида семинар-тренинглар ташкил қилинди.

АҚШ ўрмон хизматининг юқори тажрибали мутахассислари олиб борган семинарда, асосан, ўрмоннинг табиий манбаларига зарар келтирмасдан сайёҳлар оқимини кўпайтириш борасида тажриба алмашилди.

KUN.UZ таҳририяти ҳам семинарда иштирок этди ва АҚШ ўрмон хизмати мутахассиси Лия Лорд билан айни мавзуда суҳбатда бўлди.

- Мен АҚШ ҳукумат хизматининг халқаро бўлимида ишлайман. Бу ердалигимдан мақсад Ўзбекистондаги ҳамкасбларимиз билан ҳамкорлик алоқаларини ривожлантириш. Айта олишим мумкинки, ватанингизда жуда гўзал жойлар кўп. Мен шундай жойларнинг кўпроғини кўришни истайман. Мен Ўзбекистоннинг Самарқанд, Бухоро ва Тошкент каби тарихий ва замонавий шаҳарларида бўлдим. Аммо Ўзбекистонда табиат гўзаллиги акс этган жойлар ҳам бор ва улар сони кўп. Ўзбекистонлик ҳамкасбларимиз билан ўйлаймизки, мана шундай жойларни жаҳонга кўрсатиш, экотуризмни ривожлантириш учун мамлакатингизда салоҳият бор.

Айни дамда ўзбекистонлик ҳамкасбларим экотуризмни ривожлантириш учун тинимсиз, фаол ҳаракат қилишмоқда. Масалан, Тошкентга яқин “Сўқоқ” хиёбонини олайлик. Шаҳарликлар бу ерга келиб ҳордиқ чиқаришлари, сайр этишлари, табиатни, тоғларни томоша қилишлари мумкин. Бу Ўзбекистондаги ана шундай жойларга намуна бўла олади. Шу сабаб биз нима қилиш кераклигини кўрсатиб бериш учун айнан “Сўқоқ”да ишлаяпмиз.

Мен ўзбекистонликларни табиатга бўлган муносабатлари ҳақида тўлиқ тасаввурга эга эмасман, аммо шу ерлик ҳамкасбларим табиатни жуда яхши кўришади. Биз барчамиз маҳаллий одамлар ҳам, хорижликлар ҳам Ўзбекистон табиатидан, унинг мўъжизакор манзарасидан завқ олишларини истаймиз.

АҚШда бу соҳа секин-асталик билан ривожланди. Шундай вақтлар ҳам бўлдики, одамлар учун, мамлакат учун парклар, хиёбонлар, миллий ўрмонлар барпо этиш тасаввурига эга етакчилар бўлди. Менинг агентлигимнинг ташкил топганига бир асрдан ошди. Бизда миллий ўрмонлар тармоғи бор. Бу АҚШнинг 8-9 фоиз ҳудудини қамраб олган. Билишимча, Ўзбекистондаги Ўрмон хўжалиги қўмитаси мамлакатнинг 22-25 фоизини қамраб олган. Бу жуда катта имконият.

Мен бу ернинг мутахассиси эмасман, аммо тушунишимча, илгари бу ерларда сайр қилиш тақиқлангани сабаб кўпчилик бу ерларни билмайди. Бу ерга одамларни жалб этиш учун саёҳатлар ташкил этиш, қулайлик яратиш мақсадида автотураргоҳлар ташкил этиш мумкин. Боя айтганимдек, мен бу ерларни билмайман, аммо маҳаллий ҳамкасбларим бу ерларга одамлар кўп келишини исташади. Улар экотуризмни ривожлантириш учун бор кучлари билан ҳаракат қилишмоқда. Ўйлайманки, бу борада жуда кўп ишларни амалга оширса бўлади. Чунки қизиқиш бор, куч бор. Қўшма лойиҳамизга қизиқишларни ошириш учун янада кўп ҳаракат қиламиз.

Мен бу ердаги вазиятни билмайман. Аммо бу ҳолат муаммолардан биридир, тўғрироғи доимий кураш. АҚШда жамиятда мана шунга ўхшаш муаммоларга дуч келадиган бўлсак, одамларга нима қилиш тўғри ва нотўғрилигини тушунтириш мақсадида турли акциялар ташкил этамиз. Паркларда ва миллий ўрмонларда одамларга бу ернинг муҳим жойлигини, чиқинди ташлаш мумкин эмаслигини доимий равишда тушунтириб борамиз. Бундан ташқари, парк ёки ўрмонларга кириш жойларида чиқинди ташлаш мумкин эмаслигини кўрсатувчи махсус кўрсаткичлар қўйиш керак деб ўйлайман. Бу ерга ташриф буюрувчиларга ҳам нима мумкин, нима мумкин эмаслигини доимий тушунтириб бориш керак.

Айтишни истардимки, Ўзбекистон менга жуда ёқади. Учинчи марта бу мамлакатга ташриф буюришим. Ўйлайманки, охиргиси ҳам эмас. Мамлакатда туризмни, бошқа соҳаларни ривожлантириш учун жуда катта салоҳият мавжуд. бу ерлик ҳамкасбларим билан бирга ишлаш мен учун улкан шараф, - деди АҚШлик мутахассис.