Собиқ «Тошкент» меҳмонхонаси бузилиши ҳақидаги хабарлар рад этилди

Ижтимоий тармоқларда собиқ «Тошкент» меҳмонхонаси гўёки бузилиши режалаштирилаётгани ҳақида маълумот тарқалди. Ҳозир у Lotte City Hotel Tashkent Palace номи билан фаолият юритмоқда.

Хусусан, Facebook’да ушбу бинонинг барча ходимлари ишдан бўшатилгани хабар қилинди.

«Бу маълумот ҳақиқатга тўғри келмайди», – деб ёзди Тошкент шаҳри ҳокимияти вакили Гулноза Қосимова шахсий Telegram каналида Тошкент Туризм ва маданий мерос бош бошқармаси ва меҳмонхона маъмуриятига таяниб.

Пойтахт ҳокимлиги ҳам Facebook’да «снос» ҳақидаги эълонга изоҳ берди: «Собиқ „Тошкент“ меҳмонхонаси […] бузиб ташланмайди».

Lotte City Hotel Tashkent Palace – пойтахт марказида жойлашган тарихий меҳмонхона бўлиб, расмий маълумотларга кўра, бино 1958 йилда қурилган.

Шунингдек, Тошкент шаҳри расмий ахборот саҳифаларида келтирилишича, 2003 йилда меҳмонхона бошқаруви Le Meridien брендига ўтган, 2013 йилда эса реконструкциядан сўнг Lotte бренди бошқарувига берилган ва ҳозирги номи билан фаолият юритмоқда.

Мазкур меҳмонхона бўйича айрим йилларда давлат улушини хусусийлаштириш жараёнлари ҳақида ҳам расмий ахборотлар эълон қилинган, бироқ бу ҳолат бинонинг албатта бузилиши дегани эмас.