Ипотека-банк: кичик ва ўрта бизнес ҳамда аёллар тадбиркорлигини қўллаб-қувватлаш мақсадида ЕТТБ билан 40 млн долларлик шартнома имзоланди

“Ипотека-банк” АТИБ ва Европа тикланиш ва тараққиёт банки (ЕТТБ) ишончли шериклик муносабатларини давом эттириб, Ўзбекистонда коронавирус пандемиясидан зарар кўрган кичик ва ўрта бизнес корхоналарнинг ишбилармонлик фаолиятини рағбатлантириб келмоқдалар.

2020 йил 30 сентябрь куни “Ипотека-банк” АТИБнинг Бош офисида Ипотека-банк ва ЕТТБ ўртасида 40 млн АҚШ доллари миқдоридаги шартномаларни имзолаш маросими бўлиб ўтди.

Мазкур имзолаш маросимида ЕТТБ Молия институтлари департаменти Марказий Осиё бўйича бизнес-етакчиси, Марказий Осиё ва Россия бўйича катта банкир Жахан Шамсиев ва “Ипотека-банк” АТИБ Бошқаруви Раисининг биринчи ўринбосари Элёр Иномжонов бошчилигидаги вакиллар иштирок этишди.

Имзоланган ҳужжатлар тўплами ўз ичига иккита шартномани олиб, у қуйидагилардан иборат.

Биринчи – бу кичик ва ўрта бизнес вакилларини қўллаб-қувватлашга йўналтирилган 30 млн АҚШ долларлик шартнома бўлиб, 2017 йилдан буён ЕТТБ томонидан ажратилган учинчиси ҳисобланади. Бу билан кичик ва ўрта бизнесни узоқ муддатли молиявий қўллаб қувватлаш лойиҳаси доирасида ЕТТБ томонидан Ипотека-банкка ажратилган жами молиявий маблағлар миқдори 75 млн АҚШ долларига етди.

Иккинчи – бу ЕТТБ нинг “Тадбиркор аёл” дастури доирасида имзоланган 10 млн АҚШ долларлик шартнома бўлиб, мазкур молиявий маблағлар мамлакатимизда тадбиркорлик билан шуғулланувчи аёлларни қўллаб қувватлашга йўналтирилади.

Таъкидлаш жоизки, ЕТТБ нинг “Тадбиркор аёл” дастури Ўзбекистонда илк бор амалга оширилмоқда ва “Ипотека-банк” АТИБ биринчи бўлиб ушбу дастурнинг иштирокчисига айланди.

Келишувни имзолаш давомида ЕТТБ вакили Жахан Шамсиевнинг таъкидлашича, “Кичик ва ўрта бизнес вакиллари ҳамда тадбиркор аёллар фаолиятини қўллаб-қувватлаш Ўзбекистон иқтисодиётини ривожлантиришда устувор йўналишлардан бири ҳисобланади. Ўз навбатида, ЕТТБ фаолиятида ҳам кичик ва ўрта бизнес вакиллари фаолиятини ҳамда аёллар тадбиркорлигини молиялаштиришни қўллаб-қувватлаш муҳим ўрин тутади. ЕТББ ва Ипотека-банк ўртасидаги самарали ва ҳар томонлама ҳамкорлик Ўзбекистон молия сектори учун узоқ муддатли фойда келтиради”.

Шунингдек, “Ипотека-банк” АТИБ Бошқаруви Раисининг биринчи ўринбосари Э.Иномжонов: “Ипотека-банк Ўзбекистон молия бозорида энг йирик банклардан бири ҳисобланиб, бизнес соҳасида аёлларни ўқитиш ва уларнинг фаолиятини молиялаштириш учун барча имкониятларини ишга солиб, шу орқали уларнинг мамлакат иқтисодиётининг барча жабҳаларида фаол қатнашишига кўмак бериб келмоқда. Бу эса, ўз навбатида, хотин-қизларнинг келажакка ишонч билан боқишларига имкон беради. Бугун имзоланган шартнома доирасида аёллар тадбиркорлиги учун ажратиладиган молиявий маблағлар Жаҳон банки томонидан бошқарилаётган “Тадбиркор аёлларни молиялаштириш ташаббуси” томонидан тақдим этиладиган гранти билан ҳам қўллаб-қувватланади, бу эса тадбиркор аёлларга касбий таълим олишда кўмаклашади ва кейинги қадамни ташлашга билим ва ишонч беради”, – дея ўз фикрларини билдирди.

“Ипотека-банк” АТИБ Матбуот хизмати