Молдовада ўзбекистонликларга ЕИ чегарасини ноқонуний равишда кесиб ўтишда ёрдам берган жиноий гуруҳ қўлга олинди

Молдовада ноқонуний миграция тармоғи фош этилди, у Осиё давлатлари фуқароларига сохта ҳужжатлар билан Европа иттифоқи чегарасини кесиб ўтишда ёрдам бериб келган. Бу ҳақда Молдованинг Nokta нашри ушбу мамлакат Коррупцияга қарши кураш маҳкамасига таяниб хабар қилди.

Маҳкама маълумотларига кўра, уюшган гуруҳга Молдованинг икки фуқароси раҳбарлик қилган, улардан бири собиқ чегара полициячиси экани айтилади. Гуруҳ Молдова Республикаси ҳудудида Осиё давлатлари фуқароларининг вақтинча истиқомат қилишини таъминлаган. Шунингдек, у шахсни тасдиқловчи сохта ҳужжатларни тақдим этиб, кишиларни Прут дарёси орқали Руминия томонига олиб ўтиш билан шуғулланиб келган.

Кўрсатилган хизматлар учун ҳар бир мигрантдан 2000 евродан пул олинган. Руминия ҳудудига ўтиб бўлингандан кейин пул тўланган.

Чегара полицияси ва Хавфсизлик хизмати ходимлари томонидан бир вақтнинг ўзида амалга оширилган ҳаракатлардан сўнг, давлат чегараси яшил секторида, Руминия ва ЕИ чегара туманларига бевосита яқин жойда уюшган гуруҳ аъзолари, шунингдек, Европа иттифоқи чегарасини ноқонуний равишда кесиб ўтишни режалаштирган бир қатор чет эл фуқаролари қўлга олинди.

20 ёшдан 35 ёшгача бўлган хорижий фуқаролар Бангладеш Халқ Республикаси ва Ўзбекистон Республикасидан экани хабар қилинди. Ноқонуний миграция тармоғи ташкилотчилари бўлган Молдова фуқаролари 72 соатга ҳибсга олинган.
 
Суриштирув давомида аниқланишича, баъзи чет эл фуқароларига бир неча давлатларга, шу жумладан Европа иттифоқига кириш тақиқланган бўлган.