Юлдуз Усмонова эстрададаги "янги юлдузлар" ва устоз-шогирд муносабатлари ҳақида

Ўзбекистон халқ артисти Юлдуз Усмонова Kun.uz сайтига берган интервьюсида миллий эстрададаги устоз-шогирд муносабатлари ва бугунги ёш хонандаларнинг бу меъёрларга амал қилмаётгани ва "устоз кўрмаган қўшиқчилар кўпайиб кетгани" ҳақида гапириб ўтган.

"Мен бошқа санъаткорларни камдан-кам эшитаман. Чунки бошқа ижодкор қўшиғини тинглаш учун унинг мусиқаси, шеъридан қониқиш керак. Шоирлар, аранжировкачиларга бораман. Уларга қандай ишлашни ўргатаман, камчиликларини айтаман, танбеҳ бераман. Бошқа санъаткорлар улардан талаб қилишмайди ва сифатсиз, арзон-гаров қўшиқ ишлашади. Қандай қилиб мен шуни эшитай, қандай қилиб мен бундан қониқай? Индамасам, менга ҳам худди шундай қилиб бермоқчи бўлишади. Шунинг учун ҳам ҳақиқий санъаткорлар мендан ҳам қўрқади, ҳам ҳурмат қилади. Мен ҳақиқий мусиқачилар ҳақида гапиряпман. Қўлига кечагина микрофон олганлар ҳақида эмас", дея куйинади қўшиқчи.

У битта қўшиғи хит бўлганидан кейин ўзини юлдуз ҳис қилишни бошлайдиган ёш қўшиқчиларни танқид остига олган.

"Сен эртага ҳеч ким эмассан, чунки сен танилиб олдинг холос, уни ушлаб тура билиш керак. Халқнинг дардини куйламасанг, бунақаси кетмайди. Томошабинлар бир кун қарсак чалса, ойнага қараб “бу МЕНман” дея ҳис қила бошлаймиз. Мана шу нарса одамни синдиради, умуман сархушликка ҳам вақт бўлмасин. Уйга келиб, оёқ кийимингни ечиб, бу қўшиғим халққа ёқди, уни нимаси ёқди экан, мен яна қайтадан бир ишлайчи, дея бошқа бир йўналиш топиш керак. Кўп санъаткорлар “маст” бўлиб қоляпти, ана шундан синяпти. Чунки сени сен қилган аввало Аллоҳ, қолаверса халқ. Агар халқ қарсак чалмаса, халқ сени керак қилмаса, сен ҳеч ким эмассан”, дейди Юлдуз Усмонова.

Хонанда ёш хонандаларни устозларни етарли даражада ҳурмат қилмаслигини айтиб, устоз ва шогирд муносабатларига ибрат сифатида бир кичик ҳикоят келтирган.

"Авваллари эшик тақиллатганларга устозлар: “Кимсан?” дейишган. “Фалончиман” деса, эшик очилмайди. Бу ҳолат кўп марта такрорланади. Охири, юзинчи марта келганида, “Кимсан?” деб сўралганида, “ - Устоз, сиз ким десангиз, мен ўшаман дейилса”, эшик очилиб, улар шогирдликка қабул қилинганлар. Ҳозиргилар устоз бироз танбеҳ берса, унинг устидан шикоят қилиб, юқорига олиб чиқишдан тойишмаяпти. Домла қаттиқ гапирмаса, ким сенга қаттиқ гапиради? Ота-она ҳам гапирмаётган бўлса ахир. Ҳозирда битта санъаткорнинг орқасидан бутун қариндош-уруғ “юлдуз”, ота-она ҳам “юлдуз”, қариндош-уруғ ҳам “юлдуз”га айланяпи. У ҳолда ким ишлайди, ўртоқлар. Тушинглар пастга. Бу ҳаммамизга, менга ҳам тааллуқли. Тушинглар пастга. Биз халқнинг хизматчисимиз. Халқнинг дардидан уялманг. Янги йилда тилагим – китоб варағини қайтадан очишсин. Санъаткорларимиз қайтадан “Бисмиллоҳ”ни айтиб, домлалар, устозларнинг эшигини қоқишсин. Устозларнинг ҳам вақти бўлмайди. Улар ҳам шогирд бир қути ширинлик кўтариб келса, дарс бераман деб кутиб ўтирганлари йўқ. Бироқ сизга керак бўлса, эшиги олдида кутиб турасиз, чиққанида эса этагини маҳкам ушлаб оласиз. Арқонга чиқмоқчи бўлсангиз, қўлингиз тойиб, пастга тушиб кетасиз.

Арқон бўйлаб юқорига кўтарилиш учун эса машқ қилиш, чиниқиш керак. Демак, биз бутун умр чиниқишимиз керак", дея таъкидлайди хонанда.