Теннисчи Новак Жокович Париждаги мусобақада ўйинни ютқазиб бергани ҳақидаги маълумотни рад этди

Жаҳон теннисининг биринчи рақамли теннисчиси, сербиялик Новак Жокович у 2007 йилда Париждаги “Мастерс” серияси турнирида франциялик Фабрис Санторога ўйинни ютқазиб бергани ҳақидаги маълумотни рад этди. Бу ҳақда The Daily Mail нашри маълум қилди.

“Бу ёлғон. Яна нима дейиш мумкин? Мен ўша учрашувни ютқазганман. Исталган одам моҳир теннисчи исталган мусобақанинг илк даврасида ютқазган ўйини ҳақида шундай гапни айтиши мумкин. Шунинг учун бу беъмани гапдир. Исталган мусобақада исталган шундай ўйинни олиб, уни келишилган деб айтиш мумкин”, деб айтди Жокович.

Ўша мусобақанинг биринчи даврасида ўша вақтда жаҳоннинг 3-рақамли теннисчиси бўлган Жокович 39-рақамли теннисчи Фабрис Санторога 3:6, 2:6 ҳисобида ўйинни ютқазган эди.

18 январда Жокович унга 2007 йилда Санкт-Петербургдаги мусобақада ютқазиб бериши учун пора таклиф қилинганини айтиб ўтди.

Айни вақтда сербиялик “Катта дубулға” сериясининг биринчи мусобақаси Australian Open’да иштирок этмоқда. Мусобақанинг амалдаги чемпиони бўлган сербиялик 20 январда мусобақанинг иккинчи даврасида франциялик теннисчи Кентен Алисни 6:1, 6:2, 7:6 ҳисобида ютди. Жокович учинчи даврада италиялик Андреас Сеппи билан беллашади.