Жиззах вилоятининг 351 та умумтаълим мактабида 2 сменада дарслар олиб борилади

2020-2021 ўқув йилида Жиззах вилоятида жойлашган 198 та мактабда дарслар бир сменада, 351 та мактабда икки сменада ва 1 мактабда қўшимча навбат асосида олиб борилмоқда. Бу ҳақда вилоят халқ таълими бошқармаси Kun.uz’га маълум қилди.

Ҳозирда вилоятда фаолият юритаётган 550 та мактабда 11 минг 643 та синф бўлиб, бир сменали шаклда ўқиётган синфлар 5 минг 342 та, ўқувчилар сони 119 минг 110 нафарни ташкил қилади. Шунингдек, икки сменали шаклда 6 минг 283 та синф ва унда 139 390 минг ўқувчи таълим олмоқда.

Маълумот учун, бугунги кунда вилоятда мактаб ўқувчилари сони 259 009 нафарни ташкил этади. Шундан 124 минг 292 нафар ўғил ва 125 минг 717 нафар қиз болалардир.

Аввалроқ, Халқ таълими вазири Шерзод Шерматов Ўзбекистон мактабларида ўринлар сони ўқувчилар сонидан 1 миллионтага камлиги ва мактабларнинг 70 фоизида ўқиш 2 сменада ташкил этилганлиги ҳақида айтиб ўтган эди.