Германия иқтисодиёти бу йил ҳам рецессиядан чиқолмайди

The Economist Европадаги энг йирик иқтисодиётни бундай ҳолга солиб қўйган ички ва ташқи омилларни санаб ўтди.

Volkswagen заводи / Фото: Ingmar Nolting for The New York Times

Германия 20 йилдан ортиқ вақт ичида биринчи марта икки йиллик рецессияни бошдан кечирмоқда. 2024 йилда 0,3 фоизлик иқтисодий ўсиш прогнози 0,2 фоизлик пасайиш прогнозига алмаштирилган, деб ёзади The Economist.

Европанинг қудратли иқтисодий двигатели бўлган Германия ҳозир ташқи ва ички омиллар туфайли қийинчиликларга дуч келмоқда. Россиянинг Украинага босқинидан кейин энергия нархларининг ошиши Германиянинг кимё, металлга ишлов бериш ва қоғоз ишлаб чиқариш каби энергия талаб қиладиган соҳаларига қаттиқ зарба берди. Шунингдек, Хитойнинг саноат салоҳияти ортиши немис экспортига бўлган талабни камайтирди. Автомобилсозлик каби соҳаларда Хитой жиддий рақобатчига айланди.

Германиянинг ички муаммолари ҳам иқтисодий тикланишни секинлаштирмоқда. Аҳолининг қариши ва ишчи кучи танқислиги мамлакат иқтисодиёти учун жиддий тўсиқ бўлмоқда. Аввалги юқори иммиграция суръатлари демографик пасайишни қоплаган бўлса, ҳозирда мигрантлар оқими секинлашган, бу эса корхоналарда ишчи кучининг етишмаслигига олиб келмоқда. Энергия нархлари кўтарилиб, Германиянинг еврозонадаги рақобатдошлиги сусайди.

Немис иқтисодиёти 2025 йилда тикланиши ва 1,1 фоизга ўсиши кутилмоқда, аммо таркибий муаммолар, хусусан ишлаб чиқариш суръатининг пасайгани имкониятларни чеклаб қўймоқда. Ҳукуматнинг молиявий тежамкорлиги эса давлат сармоясини чеклаб, иқтисодий ўсишни янада қийинлаштирмоқда.

#Германия