Қолдирилган концертлар учун харид қилинган чипталар ўз кучида қолмоқда – Маданият вазирлиги

Ўзбекистонда карантин чекловлари туфайли қолдирилган концерт дастурларининг барчаси оммавий тадбирларга рухсат берила бошлагач, режа асосида қўйилади.

Маданият вазирлигидан маълум қилишларича, оммавий тадбирларни ўтказишга рухсат берилган кундан бошлаб, санъат саройи маъмурияти тадбиркорлар билан келишган ҳолда график асосида қолдирилган концертларни ташкиллаштириш режалаштирилган.

«Қолдирилган концертлар берилгандан сўнг, янги концертлар режага киритилади.

Шунингдек, биринчилардан Юлдуз Усмонова концертининг қолдирилган кунлари қўйилиши кўзда тутилмоқда», деди вазирлик матбуот котиби Мавлуда Асқархўжаева.

Таъкидланишича, қолдирилган концерт дастурлари учун харид қилинган чипталар ўз кучини сақлаб турибди.

Эслатиб ўтамиз, кечиктирилган концертлар учун чипта пулини қайтариб олишни истовчилар бўлса, уларга пуллари карантиндан сўнг қайтариб берилиши маълум қилинган.

Чиптани нақд пулда харид қилган мухлислар ўз пулларини нақд шаклда қайтариб олишлари мумкин. Пластик карта орқали тўлов қилганларга эса маблағлари картага тушириб берилади.

Тайёрлаган: Саодат Абдураҳмонова

#концерт #Маданият вазирлиги